काठमाडौं । विशेष अदालतले अदालतको अवहेलना मुद्दामा दृष्टि मिडियालाई सफाइ दिएको छ । आज बुधबार अदालतका अध्यक्ष टेकनारायण कुँवर तथा सदस्यहरू तेजनारायणसिंह राई, रामबहादुर थापा, मुरारीबाबु श्रेष्ठ, रितेन्द्र थापा र विदुर कोइरालाको पूर्ण इजलासबाट उक्त फैसला भएको हो ।
यस मुद्दामा दृष्टि मिडिया प्रा.लीका अध्यक्ष तथा दृष्टि साप्ताहिकका सम्पादक शम्भुलाल श्रेष्ठ र दृष्टिन्युज डटकमका तत्कालीन कार्यकारी सम्पादक एमपी सुब्बालाई प्रतिवादी बनाइएको थियो । यसअघि अदालतले दुवै प्रतिवादीबाट जनही २५–२५ हजार रुपैयाँ धरौटी माग गर्ने आदेश दिएको थियो ।
दृष्टिन्यूज डटकममा विशेष अदालतको कामकारबाही र फैसलाका विषयमा ’भ्रामक समाचार’ प्रकाशन भएको भन्दै अदालतकै कर्मचारीले प्रतिवेदन बुझाएपछि अवहेलनाको कारबाही सुरु भएको थियो । दृष्टि अनलाइनमा ‘विशेषमा सेटिङका मुद्दामा धमाधम फैसला’ भएको आशयको समाचार प्रकाशित भएको थियो ।
सोही विषयलाई लिएर अदालतले पहिलोपटक सबै न्यायाधीश सम्मिलित इजलास गठन गरिएको थियो । यस मुद्दामा अदालतलाई सहयोग गर्न वरिष्ठ अधिवक्ताहरू पूर्णमान शाक्य, रविनारायण खनाल र भीमार्जुन आचार्य सम्मिलित ’एमिकस क्युरी’ समेत गठन गरिएको थियो। लामो बहस र कानुनी प्रक्रियापछि अन्ततः अदालतले मिडियाको पक्षमा सफाइ दिने निर्णय गरेको हो ।
