काठमाडौं । पद्माकुमारी अर्यालले सरकारले प्रस्तुत गरेको नीति तथा कार्यक्रमले जनताको अपेक्षा सम्बोधन गर्न नसकेको बताएकी छन् ।
प्रतिनिधि सभामा बिहीबार भएको छलफलमा बोल्दै उनले नीति तथा कार्यक्रममा स्पष्ट दृष्टि, कार्यान्वयनको आधार र जनजीवन परिवर्तन गर्ने साहसिक संकल्प नदेखिएको टिप्पणी गरिन् ।
उनका अनुसार सरकारप्रति जनताले ठूलो आशा राखे पनि प्रस्तुत दस्तावेजले त्यो भरोसा पूरा गर्न सकेको छैन ।
“नीति तथा कार्यक्रममा शब्द छन्, दृष्टि छैन । घोषणा छन्, दिशानिर्देश छैन । नाराहरू छन् तर कार्यान्वयनको आधार छैन,” उनले भनिन् । अर्यालले आफूलाई ‘नवीन सोचको सरकार’ भन्ने नेतृत्वको दस्तावेजमै नवीनता र स्पष्टता नदेखिएको भन्दै नीति र कार्यक्रमबीचको भिन्नता समेत स्पष्ट नभएको बताइन् ।
उनले ‘समृद्ध नेपाल, सुखी नेपाली’ भन्ने राष्ट्रिय संकल्प हटाइनु पनि आपत्तिजनक भएको टिप्पणी गरिन् ।
अर्यालले नीति तथा कार्यक्रम सरकारको मात्र नभई राष्ट्रको साझा दस्तावेज भएकाले यसको समीक्षा विरोध नभई जिम्मेवार बहस भएको स्पष्ट पारिन् ।
