काठमाडौं । पूर्वसभामुख एवं नेपाली कम्युनिस्ट पार्टी (नेकपा)का नेता कृष्णबहादुर महराले सक्रिय राजनीतिबाट बिदा लिएको घोषणा गरेका छन् ।
महराले बिहीबार प्रेस वक्तव्य जारी गरी सक्रिय राजनीतिबाट बिदा लिएको घोषणा गरेका हुन् । उनले नेकपाको साधारण सदस्य भने रहिरहने जनाएका छन् ।
महराले भनेका छन्, ‘निकै गह्रौँ मनका साथ आजकै मितिदेखि पार्टीको सक्रिय जिम्मेवारीबाट अलग भई साधारण सदस्य रहने निर्णय गरेको जानकारी गराउन चाहन्छु ।’
पार्टी वा नेतृत्वसँग कुनै असन्तुष्टि कारण नभई स्वास्थ्य समस्याका कारण यस्तो निर्णय गर्न पुगेको उनले उल्लेख गरेका छन् । उनले भनेका छन्, ‘यो निर्णय कुनै असन्तुष्टि, गुनासो वा वैचारिक विचलनका कारण नभई केवल स्वास्थ्य अवस्थाले सिर्जना गरेको बाध्यात्मक परिस्थितिको परिणाम हो ।’
