काठमाडौं । सार्वजनिक यातायातलाई प्रविधिमैत्री, पारदर्शी र आधुनिक बनाउने उद्देश्यले साझा यातायातले सञ्चालनमा ल्याउन लागेको डिजिटल टिकटिङ प्रणालीमा नेपाल इन्भेष्टमेण्ट मेगा बैंक (एनआईएमबी) ले सहकार्य गर्ने भएको छ ।
साझा यातायातले सार्वजनिक यातायात सञ्चालन तथा भाडा संकलन प्रणालीलाई डिजिटल प्रविधिमार्फत थप व्यवस्थित बनाउने अभियानअन्तर्गत एनआईएमबीलाई पेमेन्ट पार्टनर बैंकका रूपमा छनोट गरेको हो ।
यस सहकार्यपछि साझा बसमा यात्रा गर्ने यात्रुले डिजिटल माध्यमबाट सहज, सुरक्षित र पारदर्शी रूपमा भाडा भुक्तानी गर्न सक्ने व्यवस्था गरिनेछ । डिजिटल ट्रान्जिट टिकटिङ प्रणालीअन्तर्गत साझा बसका यात्रुको टिकट जारी गर्न बैंकका पीओएस (एइक्) मेसिन प्रयोग गरिने जनाइएको छ । यसबाट कार्ड तथा अन्य डिजिटल माध्यममार्फत भाडा भुक्तानी गर्न सकिनेछ ।
साझा यातायातले आफ्नो डिजिटल रूपान्तरणअन्तर्गत आधुनिक कमाण्ड एन्ड कन्ट्रोल सेन्टरसहित विभिन्न प्रविधिमैत्री सेवा सञ्चालनमा ल्याएको जनाएको छ । डिजिटल टिकटिङ प्रणालीमार्फत सार्वजनिक यातायातमा नगदरहित यात्रालाई प्रवद्र्धन गर्ने लक्ष्य राखिएको छ ।
यस प्रणालीमा विभिन्न डिजिटल भुक्तानी माध्यमलाई समेटिने साझा यातायातले जनाएको छ । सार्वजनिक यातायातमा डिजिटल भुक्तानीको पहुँच विस्तारसँगै यात्रुलाई भाडा तिर्न थप सहज हुने अपेक्षा गरिएको छ ।
एनआईएमबीका अनुसार सार्वजनिक यातायात क्षेत्रमा सुरक्षित तथा सहज डिजिटल कारोबार विस्तार गर्ने उद्देश्यले गरिएको यो सहकार्य महत्वपूर्ण पहल हो । बैंकले आफ्नो डिजिटल भुक्तानी पूर्वाधार तथा सेवामार्फत साझा यातायातका यात्रुलाई सहज भुक्तानी अनुभव प्रदान गर्न सहजीकरण गर्ने जनाएको छ ।
साझा यातायात र एनआईएमबीबीचको सहकार्यले सार्वजनिक यातायातमा डिजिटल भुक्तानीको प्रयोग विस्तार, नगदरहित कारोबारको प्रवद्र्धन, भाडा संकलनमा पारदर्शिता तथा यात्रु सेवाको आधुनिकीकरणमा योगदान पुग्ने अपेक्षा गरिएको छ ।
