काठमाडौं । नेकपा एमालेको निर्वाचन समीक्षा तथा पार्टी पुनर्गठन कार्यदलको बैठक बस्दै छ । बैठक आज बिहान ९ बजे पार्टी कार्यालय च्यासलमा बस्न लागेको हो ।
पार्टी पुनर्गठनको बहस चलिरहेका बेला नेतृत्वबीच सहमति जुट्न नसकेपछि एउटै प्रतिवेदन तयार पार्ने उद्देश्यले बैठक बोलाइएको बताइएको छ ।
यसअघि महासचिव शङ्कर पोखरेल र उपाध्यक्ष रामबहादुर बादलले अलग अलग प्रतिवेदन तयार गरेपछि विवाद बढेको छ । अघिल्लो साता आवासीय बैठक बसेर दुवै प्रतिवेदनलाई एक बनाउने प्रयास गरिएको भएपनि नेताहरुबीच सहमति हुन नसकेपछि अध्यक्ष केपी ओलीको निर्देशनमा नेता प्रदीप ज्ञवालीले अलग्गै प्रतिवेदन तयार गरेको बुझिएको छ । ज्ञवालीको प्रतिवेदन आजको बैठकमा पेश हुने बताइएको छ ।
आज कार्यदल बैठकपछि दिउँसो १ बजे सचिवालय बैठक बस्नेछ । सचिवालयले भोलिदेखि सुरु हुने केन्द्रीय कमिटी बैठकका एजेन्डा तय गर्नेछ । केन्द्रीय कमिटी बैठक असोज ५ देखि ७ गतेसम्म ललितपुरको भैँसेपाटीमा बस्ने तयारी छ ।
