‘सरकारले लत्तो छोड्नु गैरजिम्मेवारपूर्ण’ « Drishti News – Nepalese News Portal
Logo

‘सरकारले लत्तो छोड्नु गैरजिम्मेवारपूर्ण’


दृष्टि संवाददाता


काठमाडौं । कोरोना संक्रमण (कोभिड–१९)को दोस्रो लहर बढ्दै गएपछि सरकारले स्वास्थ्य प्रणालीले धान्न नसक्ने अवस्था आएको र बिरामीलाई अस्पतालमा शय्या उपलब्ध गराउनसमेत नसकिने’ जनाएपछि त्यसको चौतर्फी आलोचना सुरु भएको छ ।

संकटको अवस्थमा जनतालाई हौसला दिनपर्नेमा उल्टै अस्पतालमा बेड नभएको भन्दै स्वास्थ्य मन्त्रालयले ‘सुरक्षित हुन’ अपील गर्दा नागरिकमा त्रास फैलाएको भन्दै शनिबार मानव अधिकार तथा शान्ति समाजले विज्ञप्ति निकाल्दै आपत्ति जनाएको छ ।

यस्तै, सरकारको उक्त अभिव्यक्तिप्रति विवेकशील साझा पार्टीले पनि ध्यानाकर्षण भएको जनाएको छ । शनिबार साझाले नागरिकलाई सहयोगका लागि अभिप्रेरित गर्नुपर्नेमा दैनिक साढे पाँच हजार सङ्क्रमण देखिएको स्थितिमै सरकारले यसरी लत्तो छाडिदिनु एकदमै गैह्रजिम्मेवारपूर्ण र गम्भीर आपत्तिको विषय भएको पार्टीले भनेको छ ।

शनिबार प्रेस विज्ञप्ति जारी गर्दै विवेकशीलले भनेको छ, ‘आजको यो स्थिति आउनुमा क–कसलाई उत्तरदायी बनाउनु पर्ने हो, उपयुक्त समयमा त्यो गरिने नै छ। तर अहिले राज्य र सबै नागरिक एकजुट भएर संकटसँग जुध्नुपर्ने समय भएकाले विवेकशील साझा पार्टी तत्काल निम्न कामहरू अघि बढाउन सरकारलाई आह्वान गर्दछ ।’

सरकारलाई ६ सुझाव
१) काठमाडौं उपत्यकासहित देशका प्रमुख सहरका निजी अस्पतालमा समेत कोरोना संक्रमितको उपचारको व्यवस्था तथा निजी अस्पतालसँग सम्बद्ध जनशक्ति र स्रोत–साधनको समुचित प्रयोग ।
२) सेना र प्रहरीसमेतको सहयोग लिएर कोरोनाबाट प्रभावित सबै क्षेत्रमा अस्थायी उपचार केन्द्रहरूको स्थापना ।
३) सेना र प्रहरीकासहित देशभित्र र देश बाहिर रहेका सबै सेवा निवृत्त चिकित्सक र स्वास्थ्यकर्मीहरूलाई बिरामीको उपचार सेवामा स्वयंसेवी भई सहयोग गर्न अपिल ।
४) मित्र राष्ट्रहरू खास गरी चीनसँग विपद् व्यवस्थापन विज्ञ टोलीदेखि अक्सिजन, भेन्टिलेटर, पी.पी.ई. जस्ता आवश्यक सामग्री सहयोगको अपिल ।

५) हाल रोकिएको कोभिड १९ विरूद्धको खोप कार्यक्रम व्यवस्थित बनाएर तत्काल पुनः सञ्चालन ।
६) निषेधाज्ञा अवधि लम्ब्याउनुपर्ने अवस्था आइ परे श्रमिक तथा दैनिक ज्याला मजदुरी गर्ने अति विपन्न वर्ग विगतमा जस्तै खानै नपाउने गरी समस्यामा पर्ने हुनाले त्यस्तो स्थिति आउन नदिन अहिलेदेखि नै आवश्यक तयारी ।

प्रतिक्रिया दिनुहोस्