काठमाडौं । नेकपा एमालेले नौ वटा विभाग बनाएको छ । सोमबार बसेको स्थायी कमिटीको बैठकले संगठन, स्कुलसहितका नौ वटा विभाग गठन गरेको हो ।
पार्टी प्रवक्ता प्रदीप ज्ञवालीका अनुसार स्कूल विभागको प्रमुखमा अध्यक्ष केपी शर्मा ओली नै रहने भएका छन् । स्कूल विभागमा ११ जना सदस्य चयन गरिएको छ ।
संगठन प्रमुखमा जिम्मेवारी विष्णु पौडेललाई दिइएको छ भने संसदीय विभागको प्रमुख सुवासचन्द्र नेम्वाङलाई दिइएको छ । दुवै विभागमा १४ सदस्य रहने जनाइएको छ ।
आर्थिक विभाग प्रमुखको जिम्मेवारी विष्णु रिमाल, प्रचार विभागको प्रमुख प्रदीप ज्ञवाली, पर्यटन विभागको प्रमुखमा भानुभक्त ढकाल, विदेश विभागको प्रमुखमा राजन भट्टराई, निर्वाचन विभागको प्रमुखमा अग्नि खरेललाई दिइएको छ ।
