काठमाडौं । १५ वर्षमुनि (यु–१५) महिला साफ च्याम्पियनसीप फुटबलमा नेपालले भूटानलाई पराजित गर्दै प्रतियोगितामा विजयी सुरुआत गरेको छ ।
बङ्गलादेशको ढाकामा आज भएको खेलमा भूटानलाई ७-० गोलअन्तरले पराजित गर्दै नेपालले विजयी सुरुआत गरेको हो । नेपालले खेलको पहिलो हाफमा चार गोल गर्यो भने खेलको दोस्रो हाफमा तीन गोल थप्यो ।
नेपालको जितमा वर्षा ओलीले चार गोल गरे भने सुक्रिया मियाँले दुई तथा सेनु परियारले एक गोल गरे । वर्षाले खेल सुरुआती मिनेटमा पहिलो गोल गर्दै नेपालको खाता खोलेका थिए ।
त्यस्तै उनले खेलको १७औँ मिनेटमा दोस्रो गोल गरे भने खेलको ३४औँ मिनेटमा ह्याट्रिक पूरा गरे । । त्यसैगरी उनले खेलको ३५औँ मिनेटमा थप एक गोल गरे ।
नेपालकी अर्की खेलाडी सुक्रियाले खेलको ६५औँ मिनेटमा गोल गरे भने उनले खेलको ७२औँ मिनेटमा व्यक्तिगत दोस्रो गोल गरे ।
त्यसैगरी नेपालकी अर्की खेलाडी सेनु परियारले खेलको ८५औँ मिनेटमा एक गोल गर्दै नेपाललाई ७–० गोलको जित दिलाए ।
यसअघि भएको उद्घाटन खेलमा बङ्गलादेशले भूटानलाई ८–० गोलअन्तरले हराएको थियो ।
प्रतियोगितामा बङ्गलादेशसँगै नेपाल र भूटानको सहभागिता रहेको छ ।
अब नेपालले आफनो दोस्रो खेल यही कात्तिक १८ गते बङ्गलादेशसँग खेल्नेछ ।
डबल राउण्ड रोबिन लिगको आधारमा हुने प्रतियोगिताको शीर्ष टोलीले उपाधि जित्नेछ ।
