काठमाडौं । नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपाल र जापानी संसद्को प्रतिनिधिमण्डलबीच भेटवार्ता भएको छ । जापानी संसद्का सदस्य मासाकी जैराले आलोकनगरस्थित पार्टी केन्द्रीय कार्यालयमा अध्यक्ष नेपाललाई भेटेका हुन् ।
भेटमा नेपाल र जापानबीचको सम्बन्ध, आर्थिक, जलविद्युत परियोजना, पर्यटन, नारायणहिटी दरबार सङ्ग्रहालयलगायतका विषयमा जापान सरकारको सहयोगका विषयमा छलफल भएको छ । जापानमा नेपाली श्रमिकको भूमिका, श्रमका क्षेत्रमा नेपालको योगदानबारे जैराले प्रशंसा गरेका थिए ।
अध्यक्ष नेपालले नेपालको विकासका लागि जलविद्युत परियोजना, पर्यटन, नारायणहिटी दरबार सङ्ग्रहालयको विकास, प्रवर्द्धन तथा संरक्षणका निम्ति जापानको भूमिका सह्रानीय रहेको र आगामी दिनमा यस्तै भूमिकाको अपेक्षाबारे गरेको बताएका थिए ।
