काठमाडौं । नेकपा (माओवादी केन्द्र) का उपमहासचिव वर्षमान पुनले अध्यक्ष पुष्पकमल दाहाल ‘प्रचण्ड’ र उपमहासचिव जनार्दन शर्माबीचको अन्तरविरोधले पार्टी विभाजन नहुने बताएका छन् । शनिवार स्थायी समिति बैठकपछि सञ्चारकर्मीसँग कुरा गर्दै उनले पार्टीभित्रका मतभेद छलफलबाट समाधान गरी प्रचण्डकै नेतृत्वमा एकताबद्ध भएर अघि बढ्ने बताए ।
पुनले विचार मिल्ने दलहरूसँग पार्टी एकताको पहल भइरहेको पनि उल्लेख गरे । ‘कतिपय मानिसले एकता हुन लागे भनेपछि धेरै भ्रम फैलाउने गर्छन् । एकता हुन नदिने कोसिस गर्छन् । नियमित छलफल र बहसबाट मतभेद साँघुराउँदै जान्छौँ । हामीले नियमित काम गरिरहेका छौँ । हामी धेरै हल्लाखल्ला नगरी छलफल अघि बढाइरहेका छौँ,’उनले भने ।
नेकपा एकीकृत समाजवादी र नेकपासँग नियमित छलफल र बहसबाट एकताको एजेन्डा अघि बढाइएको उनको भनाइ छ । ‘समाजवादी मोर्चामा आबद्ध दलहरूसँग छलफल गरी मतभेद साँघुराउँदै एकताबद्ध हुने प्रयासमा छौँ,’ उनले भने ।
