काठमाडौं। प्रधानमन्त्री सुशीला कार्कीसँग नर्वेका राजदूत ड्याग्नी मियोसले आज शिष्टाचार भेट गरेका छन्।
प्रधानमन्त्री कार्यालय सिंहदरबारमा भएको भेटमा नेपाल-नर्वे द्विपक्षीय सम्बन्ध, आपसी हितका विषय तथा समसामयिक राजनीतिक अवस्थाबारे छलफल भएको थियो ।
उक्त अवसरमा राजदूत मियोसले नेपालकी पहिलो महिला प्रधानमन्त्रीका रूपमा कार्कीलाई पाउँदा खुसी व्यक्त गर्दै उनको नेतृत्वमा आगामी निर्वाचन शान्तिपूर्ण र निर्बाध रूपमा सम्पन्न हुने विश्वास व्यक्त गरे । साथै उनले नेपालको शान्ति प्रक्रिया, संविधान निर्माण, जलवायु परिवर्तन तथा दिगो विकासका क्षेत्रमा नर्वेले गर्दै आएको सहयोगको स्मरण गराउँदै आगामी दिनमा पनि सहयोग निरन्तर रहने प्रतिबद्धता जनाए ।
प्रधानमन्त्री कार्कीले असामान्य राजनीतिक परिस्थितिमा आफू सरकारको नेतृत्वमा आउनुपरेको उल्लेख गर्दै अब मुलुक क्रमशः सामान्य अवस्थामा फर्कँदै निर्वाचनतर्फ उन्मुख भएको बताइन् । नर्वेसहित अन्तर्राष्ट्रिय समुदायबाट प्राप्त विश्वास र समर्थनप्रति उनले धन्यवाद पनि व्यक्त गरिन् ।
प्रधानमन्त्री कार्की र राजदूत मियोसबीचको यो पहिलो औपचारिक भेट हो ।
