सिन्धुपाल्चोक । विद्यार्थीलाई यौन दुर्व्यवहार गरेको आरोपमा सिन्धुपाल्चोकमा एक शिक्षक पक्राउ परेका छन् ।
पक्राउ पर्नेमा चौतारा साँगाचोकगढी नगरपालिका-१२ साँगाचोकस्थित जनजागृति माध्यमिक विद्यालयका शिक्षक जितराज गिरी रहेका छन् । उनलाई नियन्त्रणमा लिएर म्याद थपको प्रक्रिया अघि बढाइएको जिल्ला प्रहरी कार्यालय सिन्धुपाल्चोकका एसपी काजिकुमार आचार्यले जानकारी दिए ।
प्रहरीका अनुसार विद्यालय नजिकै गिरीको आफ्नै स्टेशनरी पसल छ । सोही पसलमा गएकी १२ वर्षीया छात्रामाथि गिरीले यौन दुर्व्यवहार गरेको आरोप लागेको हो । पीडित बालिका कक्षा ७ मा अध्ययनरत छिन् ।
बालिकाले आफूलाई भएको दुर्व्यवहारबारे आफन्तलाई जानकारी दिएपछि घटनाबारे प्रहरीमा जाहेरी दर्ता गरिएको थियो । जाहेरीपछि आरोपित शिक्षकलाई नियन्त्रणमा लिएर अनुसन्धान सुरु गरिएको प्रहरीले जनाएको छ ।
यता, आरोपित गिरीले भने आरोप अस्वीकार गर्दै ‘माया गरेर गाला मात्रै छोएको’ दाबी गरेका छन् । उनले आरोप अस्वीकार गरेपछि बालिकाका आफन्तले बुधबार विरोध र दबाब सिर्जना गरेका थिए ।
घटनाबारे जानकारी पाएपछि अभिभावकहरू विद्यालय पुगेर छलफलमा जुटेका थिए । तर आरोपितले दोष स्वीकार नगरेपछि विद्यालय परिसरमा अवस्था तनावग्रस्त बनेको थियो । सोही कारण प्रहरी टोलीले शिक्षक गिरीलाई नियन्त्रणमा लिएको जनाएको छ ।
