काठमाडौं । कामना सेवा विकास बैङ्क लिमिटेडले वित्तीय साक्षरता अभिवृद्धि गर्ने नयाँ वर्ष २०८३ सालको अवसरमा “वित्तीय साक्षरता कथा सङ्ग्रह” तथा सम्बन्धित भिडियो सामग्रीहरू सार्वजनिक गरेको छ ।
उक्त “वित्तीय साक्षरता कथा सङ्ग्रह” बैङ्कका प्रमुख कार्यकारी अधिकृत दिनेश थकालीले अनावरण गरेका हुन् । । बैङ्कले वित्तीय साक्षरता केवल सूचना होइन, व्यवहार परिवर्तन गर्ने प्रक्रिया भएको उल्लेख गर्दै कथा तथा भिडियो सामग्रीले त्यसलाई अझ प्रभावकारी रूपमा जनमानससम्म पुर्याउने विश्वास व्यक्त गरेको छ ।
कथा सङ्ग्रहमा दैनिक जीवनसँग प्रत्यक्ष सम्बन्धित वित्तीय निर्णय, बचतको महत्त्व, जिम्मेवार खर्च, बैङ्किङ सेवा प्रयोग, तथा आर्थिक योजना जस्ता विषयहरूलाई सरल, रोचक र सन्देशमूलक कथाहरूका माध्यमबाट प्रस्तुत गरिएको छ ।
यो कथा सङ्ग्रह देशभरका विभिन्न विद्यालयहरूमा वितरण गरिनेछ, जसले विद्यार्थीहरूमा प्रारम्भिक उमेरदेखि नै वित्तीय अनुशासन, बचत गर्ने बानी र जिम्मेवार खर्च गर्ने व्यवहार विकास गर्न सहयोग पुर्याउने बैङ्कले जनाएको छ । बैङ्कले आफ्ना ग्राहकहरूलाई लक्षित गर्दै “AlphaGrow Savings Account”खोल्ने ग्राहकहरूलाई प्रोत्साहनस्वरूप खुत्रुकेसँगै उक्त कथा सङ्ग्रह समेत प्रदान गर्ने व्यवस्था मिलाएको छ, जसले बचत व्यवस्थापनलाई व्यवहारिक रूपमा प्रोत्साहन गर्ने अपेक्षा गरिएको छ ।
यस अभियानको विशेष आकर्षणका रूपमा कथा सङ्ग्रहलाई भिडियो उत्पादनमार्फत डिजिटल रूपान्तरण गरिएको छ । यी भिडियोहरूमा कथाका पात्रहरूलाई दृश्यात्मक रूपमा जीवन्त बनाउँदै वित्तीय सन्देशलाई अझ प्रभावकारी ढङ्गले प्रस्तुत गरिएको छ । बैङ्कका अनुसार, भिडियो सामग्रीले विशेषगरी बालबालिका, युवा तथा सामाजिक सञ्जाल प्रयोगकर्ताहरूलाई आकर्षित गर्दै वित्तीय साक्षरतालाई मनोरञ्जनात्मक र सजिलै बुझ्न सकिने माध्यममा रूपान्तरण गर्नेछ ।
कथा संग्रहसँग सम्बन्धित भिडियो सामग्रीहरू प्रत्येक हप्तामा दुई दिन बैङ्कको आधिकारिक सामाजिक सञ्जालहरुमार्फत सार्वजनिक गरिनेछ । बैङ्कले वित्तीय साक्षरता अभिवृद्धि आजको आवश्यकता भएको उल्लेख गर्दै यस प्रकारका कार्यक्रमहरूलाई आगामी दिनहरूमा अझ विस्तार गर्दै लैजाने प्रतिबद्धता व्यक्त गरेको छ । साथै, यस अभियानमार्फत समुदाय स्तरमै वित्तीय पहुँच विस्तार गर्दै जिम्मेवार बैङ्किङ अभ्यासलाई प्रवर्द्धन गर्ने लक्ष्य राखिएको जनाएको छ ।
