काठमाडौं । नेपाली कांग्रेसका सभापति गगनकुमार थापाले प्रधानमन्त्री बालेन शाह निजी क्षेत्रप्रति सकारात्मक नरहेको आरोप लगाएका छन् । शुक्रबार काठमाडौँमा आयोजित एक कार्यक्रममा बोल्दै उनले यस्तो टिप्पणी गरेका हुन्।
प्रधानमन्त्री शाहका पछिल्ला अभिव्यक्ति र निर्णयहरूले सरकारको निजी क्षेत्रप्रतिको दृष्टिकोण सकारात्मक नदेखिएको थापाले बताए । देशको अर्थतन्त्र कता लैजाने भन्ने विषयमा प्रधानमन्त्रीले स्पष्ट आर्थिक नीति र प्राथमिकता तय गर्नुपर्नेमा त्यसतर्फ ध्यान जान नसकेको उनले औँल्याए ।
दुग्ध विकास संस्थान, हेटौँडा कपडा उद्योग र नेपाल औषधि लिमिटेडलगायतका सरकारी उद्योग सञ्चालनको विषयलाई राज्यको समग्र आर्थिक नीतिसँग जोडेर हेर्नुपर्ने उनको भनाइ छ । सरकार आफैँले उद्योग सञ्चालन गर्नुभन्दा अर्थतन्त्रमा निजी क्षेत्रको भूमिका विस्तार गर्ने नीति अघि सार्नुपर्नेमा उनले जोड दिए ।
२०४६ सालपछि तत्कालीन प्रधानमन्त्री गिरिजाप्रसाद कोइरालाले खुला, उदार र बजारमुखी अर्थतन्त्रको बाटो रोजेको स्मरण गर्दै थापाले प्रधानमन्त्रीको छनोटले नै देशको गन्तव्य निर्धारण गर्ने बताए । तत्कालीन सरकारले निजी क्षेत्र र बजारलाई विश्वास नगरेको भए आर्थिक विकासको आधार निर्माण हुन नसक्ने उनको दाबी थियो ।
देश कुन बाटोतिर लैजाने भन्ने निर्णय प्रधानमन्त्रीले गर्ने थापाले बताए । ‘अहिलेको प्रधानमन्त्रीलाई निजी क्षेत्र हेर्नै मन पर्दैन,’ उनले भने, ‘यो मेरो आफ्नो बुझाइमा मात्र हैन, हि हेट्स प्राइभेट सेक्टर ।’
यो कुरा आफूले अनुमानका आधारमा मात्र नभनेको उनले प्रस्ट पारे। ‘अहिले उनका पछिल्ला समयका कतिपय अभिव्यक्ति र निर्णयहरू यस्तै छन्,’ थापाले थपे, ‘मैले अस्ति पार्टीको केन्द्रीय समितिको बैठकमा पनि लामो समय लिएर यो कुरा भनेको छु ।’
सरकारी उद्योगहरूबारे टिप्पणी गर्दै उनले यी कुरा हेर्दा सामान्य लागे पनि राज्य सञ्चालन गर्नेले अर्थतन्त्रको अवस्था बुझ्नुपर्ने बताए । ‘दुग्ध विकास संस्थान, हेटौँडा कारखाना र नेपाल औषधि लिमिटेड चलून्, मुनाफा कमाउन् भन्ने मेरो शुभेच्छा छ,’ उनले भने, ‘तर स्टेट चलाउने मान्छेले आजको दिनमा इकोनोमी कस्तो छ भनेर हेर्नुपर्छ ।’
