काठमाडौं । विश्वकप छनोट अन्तरगत मोन्टिनेगरोविरुद्ध मेम्फिस डिपेको दुई गोलको मद्दतले नेदरल्याण्डले शानदार जीत हासिल गरेको छ । शनिबार भएको खेलमा नेदरल्याण्ड ४–० गोलले विजयी बनेका हो ।
बार्सिलोनाका फरवार्डले खेलको पहिलो हाफमा पेनाल्टीबाट नेदरल्याण्डलाई अग्रता दिलाएका थिए । दोस्रो हाफमा उनले नै टोलीको अग्रता दोब्बर बनाए । पछिल्ला ९ खेलमा उनले टोलीका लागि ९ गोल गरेका छन् । टोलीका लागि उनको ३० औँ गोल थियो ।
खेलको ७० औँ मिनेटमा जर्जिनियो विजनाल्डमले अर्को गोल थपे । त्यसपछि कोडी गाक्पोले सुन्दर गोल गर्दै टोलीको जीत सुनिश्चित गरे । जीतसँगै नेदरल्याण्ड समूह जीको दोस्रो स्थानमा उक्लिएको छ । शीर्ष स्थानमा रहेको टर्कीसँग नेदरल्याण्डले मंगलबार भिड्नेछ । टर्कीले गिल्ब्राटारालाई ३–० ले हराएको छ ।
