काठमाडौं । मन्त्रिपरिषद विस्तारमा प्रधानमन्त्री शेरबहादुर देउवा नै असन्तुष्ट देखिएका छन् । प्रधानमन्त्री देउवाले क्षमतावानलाई मन्त्री बनाउन नपाएको भन्दै असन्तुष्टि व्यक्त गरेका हुन् ।
शनिबार आफ्नो सरकारी निवास बालुवाटारमा ‘स्कुल अफ डेमोक्रेसी अमेरिका’का शाखाद्वारा आयोजित पुस्तक विमोचन कार्यक्रम प्रधानमन्त्री देउवा गठबन्धनको सरकार हुँदा नेपाली काँग्रेसका क्षमतावान र योग्य नेतालाई मन्त्री बनाउन नसकेको बताए । ‘शुक्रबार मन्त्रिपरिषद्ले पूर्णता पाएको छ’ उनले भने, ‘तर गठबन्धनको सरकार हुँदा पार्टीका क्षमतावान र योग्य साथीहरू मन्त्री बनाउन सकिएन । यसमा म दुःखी छु ।’
प्रधानमन्त्री देउवाले भोलिका दिनमा अरुलाई उचित जिम्मेवारी दिने समेत बताए । प्रधानमन्त्री देउवाले आफ्नो नेतृत्वको सरकार बनेको ८८ दिनपछि शुक्रबार १६ मन्त्री र २ राज्यमन्त्री थपेर सरकारलाई पूर्णता दिएका छन् । यसक्रममा नेपाली काँग्रेसभित्र रामचन्द्र पौडेल पक्ष असन्तुष्ट बनेको छ भने सत्तारुढ दलका अन्य घटकभित्र पनि असन्तुष्टि बढेको छ ।
कार्यक्रममा काँग्रेस नेता मीन विश्वकर्मा, तारादेवी भट्ट र नैनसिंह महरले किताब र बिपी कोइरालाबारे प्रकाश पारेका थिए । यस्तै कार्यक्रममा संविधानविद् तथा बीपीबारे अध्येता बिपीन अधिकारीले आफ्नो धारणा राखेका थिए ।
