एजेन्सी । शनिबार इन्डोनेशियाको जाभामा भएको ज्वालामुखी विस्फोटनका कारण १३ जनाको मृत्यु भएको छ ।
थुप्रै घाइते भएको आपत्कालीन विभागले जनाएको छ ।उक्त क्षेत्रका वासिन्दाहरु ठूलो खरानीको बादलबाट भाग्दै गरेको देख्न सकिन्छ । विभिन्न तस्बिरहरुमा ज्वालामुखीको खरानीले गाउँका छतहरु सबै ढाकेको देखिन्छ । स्थानीयहरुका अनुसार उक्त खरानीको बादलले सूर्यलाई पनि ढाकेपछि अँध्यारो भएको थियो ।
अधिकारीहरुका अनुसार अहिलेसम्म ५७ जना घाइते भएका छन् । जसमध्ये धेरैलाई नराम्ररी पोलेको छ । इन्डोनेशियाको प्रकोप समाधान एजेन्सीका प्रवक्ताले बताए अनुसार लुमाजाङ जिल्लामा अवस्थित ११ वटा गाउँ ज्वालामुखीको खरानीले भरिएका छन् । सबै घाइतेहरुको उपचार भइरहेको छ ।
९०२ भन्दा धेरै नागरिकलाई उक्त क्षेत्रबाट बाहिर निकालिएको छ । उद्धार कार्य अझै जारी छ । तर, बाक्लो धुँवा, विजुली कटौती अनि भारी वर्षा र तुफानका कारण उद्धारमा अवरोध भइरहेको छ ।
