काठमाडौं । उपप्रधान, भौतिक पूर्वाधार तथा यातायात मन्त्री नारायणकाजी श्रेष्ठले एक महिनाभित्र सडकका खाल्डा पुर्न निर्देशन दिएका छन् ।
मन्त्रालयमा आयोजित सडक विभागको ब्रिफिङ कार्यक्रममा मन्त्री श्रेष्ठले सडकको खाल्डोहरु पुर्न उपत्यकाभित्र १५ दिन र उपत्यका बाहिरको १ महिना भित्र सम्पन्न गर्न निर्देशन दिएका हुन् ।
‘निर्धारित समयमा गुणस्तरीय पूर्वाधार निर्माण गर्नुको विकल्प छैन’, उनले भने । यसको लागि राजनीतिज्ञ र कर्मचारीले सुशासन कायम गर्न आत्माआलोचना सहित शून्य सहनशीलताको नीति अवलम्बन गर्न अपरिहार्य रहेकोमा मन्त्री श्रेष्ठको जोड रहेको छ ।
उनले अत्यन्त समस्याग्रस्त आयोजनाको छुट्टै सूची बनाएर कारबाहीको प्रक्रिया अगाडि बढाउनसमेत निर्देशन दिएका छन् । जागिरे मानसिकताबाट माथि उठेर विकास निर्माणमा जिम्मेवार हुन कर्मचारीले आफूलाई रूपान्तरण गर्न जरुरी रहेको बताउँदै मन्त्री श्रेष्ठले सञ्चालित सम्पूर्ण आयोजनाको अवस्था र भावी योजना ५ दिनभित्र पेश गर्न निर्देशन दिएको थियो।
