विवादास्पद निर्देशन दिएर पब्जीको विश्वकप हेर्न इन्डोनेसिया लागे बालेन 

काठमाडौं । काठमाडौं महानगरपालिकाका मेयर बालेन्द्र साह (बालेन) विवादास्पद निर्देशन दिएर विदेश भ्रमणमा निस्किएका छन् ।  

पब्जीको विश्वकप भनिने पब्जी मोबाइल ग्लोबल च्याम्पियनसिप (पीएमजिसी)को फाइनल हेर्न मेयर बालेन इन्डोनेसिया गएका हुन् ।  मंगलबार बेलुकी परिवारको सदस्य, सचिवालय सदस्यको परिवार र रुटिन अफ नेपाल बन्द सञ्चालक भिक्टर पौडेलसँगै उनी इन्डोनेसिया भ्रमणमा निस्किएका हुन् ।  

पीएमजिसीको फाइन खेल भोलि (जनवरी ६) देखि आइतबार (जनवरी ८)सम्म इन्डोनेसियाको राजधानी जकार्तामा हुँदैछ । आइतबार पीएमजिसीको फाइन सकिएपछि मेयर बालेनको टिम नेपाल फर्किनेछन् । 

भिक्टरले स्थानीय तहको निर्वाचनमा बालेन जिताउन महत्वपूर्ण भूमिका खेलेका थिए । उनी  ई-स्पोर्टस्सँग पनि जोडिएका छन् ।

नेपाली टोली द रियल सोल्जर्स (डीआरएस) गेमिङ भिक्टरको आफ्नै हो । डीआरएस पीएमजिसीको फाइनलमा छनोट भएको छ । डीआरएससँगै नेपाली अर्को टोली ट्रेन्ड टु किल (टिटुके) पनि फाइनल खेल्दैछ । त्यसका लागि नेपाली दुवै टोली जकार्ता पुगेका छन् ।

गत महिना मलेसियामा भएको समूह चरणमा उत्कृष्ट प्रदर्शन गर्दै टीटूके फाइनलमा पुगेको थियो । डीआरएसले भने सर्भाइभल चरण र त्यसपछि लास्ट चान्स हुँदै फाइनल चरणमा स्थान पक्का गरेको थियो । 

सर्भाइभल चरणबाट १६ टिम लास्ट चान्सका लागि छनोट हुँदा डीआरएस एक सय १४ अङ्कसहित सातौँ भएको थियो । नेपाली अर्को टोली स्काइ लाइड्जले भने सर्भाइभल चरण पार गर्न सकेन ।

बालेनले बजेट सार्वजनिक गर्दा पनि सामाजिक विकास विभाग अन्तर्गत ई–स्पोर्टस् प्रतियोगिता आयोजना गर्नका लागि एक करोड रुपैयाँ विनियोजन समेत गरेका थिए । त्यसपछि चौतर्फी उनको विरोध भएको थियो । 

यता, इन्डोनेसिया जानुअघि मेयर बालेन दिइराखेको निर्देशनको भने आलोचना भइरहेको छ । उनले इन्डोनेसिया जानअघि काठमाडौंको दरबारमार्ग क्षेत्रमा सवारिसाधन पार्किङमा रोक लगाउन मौखिक निर्देशन दिएका दिए । 

सोही अनुसार नेपाल प्रहरी, ट्राफिक प्रहरीको सहयोगमा महानगर प्रहरीले मंगलबार उक्त क्षेत्रमा माइकिङ गर्दै पार्किङ गर्न रोक लगाएको छ । दरबारमार्गको सडकबाट पार्किङ हटाइएपछि त्यहाँका व्यवसायी तथा व्यापारीले आपत्ति जनाउँदै आएका छन् । 

उनीहरूले काठमाडौं उपत्यका ट्राफिक प्रहरी महाशाखामा ध्यानाकर्षण पनि गराएका छन् । पार्किङ हटाउँदा कोरोना महामारी र लकडाउनका कारण थलिएर विस्तारै तंग्रिन लागेको दरबारमार्गको व्यापार व्यवसायमा नकरात्मक असर गर्ने उनीहरूको भनाइ छ । 

ट्राफिक प्रहरी, सडक विभाग र काठमाडौं महानगरपालिकासँग विगतमा भएको सहमति अनुसार एक लाइन पार्किङ गर्न पाउनु पर्ने व्यवसायीको माग छ । पार्किङ व्यवस्थापनका लागि छलफल गर्न जाँदा महानगरका मेयर बालेन साहले समय नदिएको तर अहिले एक्कासि पार्किङ हटाइएको उनीहरूको आरोप छ ।