दाङ । बर्दियामा चितुवाको आक्रमणबाट एक बालकको मृत्यु भएको छ । शनिबार बेलुकी ७ बजेतिर बर्दियाको मधुवन नगरपालिका–९ भाटचोकमा चितुवाको आक्रमणबाट साढे २ वर्षीय रिहान चलाउनेको मृत्यु भएको प्रहरीले जनाएको हो ।
जिल्ला प्रहरी कार्यालय बर्दियाका डिएसपी ऋषिराम घर्तिमगरका अनुसार घरको आँगनमा खेलिरहेका बालकलाई चितुवाले आक्रमण गरी बोकेर थियो । बालकका आमाले बच्चालाई नदेखेपछि हारगुहार गरेकी थिइन् । प्रहरीसहितको टोलीले खोजी गर्दा राति सवा ९ बजे घरबाट झन्डै ५ सय मिटर पर बालकको शव भेटिएको प्रहरीले जनाएको छ ।
बालकका आमा रचना शनिबार मात्रै छोरालाई लिएर बर्दियास्थित सानीआमा जमुना कँडेलको घर गएकी थिइन् । रचनाको घर भने बाँकेको राप्तिसोनारी गाउँपालिका–५ हो । मृत भेटिएको बालकको घाँटी र टाउको पछाडिको भागमा चोट लागेको छ । घाउखतको विश्लेषण गर्दा चितुवाले आक्रमण गरेको भन्ने निष्कर्षमा प्रहरी पुगेको हो ।
राति सवा ११ बजेपछि मुचुल्का तयार पारी बालकको शव पोष्टमर्टका लागि जिल्ला अस्पताल गुलरियामा पठाइएको डिएसपी घर्तिमगरले बताए ।
