भैरहवा : गृहमन्त्री रमेश लेखकले भैरहवास्थित गौतमबुद्ध अन्तरराष्ट्रिय विमानस्थलको निरीक्षण गरेका छन्। पार्टी कार्यक्रमको सिलसिलामा रुपन्देहीमा रहेका मन्त्री लेखकले मङ्गलबार बिहान विमानस्थलको निरीक्षण तथा अवलोकन गरेका हुन्।
गौतमबुद्ध अन्तरराष्ट्रिय विमानस्थल नागरिक उडड्यन कार्यालय सिद्धार्थनगरका सूचना अधिकारी विनोदसिंह रावतका अनुसार गृहमन्त्री लेखक आज बिहान ९ बजे निरीक्षणका लागि विमानस्थल पुगेका थिए।
निरीक्षणपछि गृहमन्त्री लेखकले विमानस्थलमा रहेको अध्यागमन कार्यालय, त्यहाँको सुरक्षा व्यवस्थासहित विमानस्थलको विषयमा बुझेको बताए।
गृहमन्त्री लेखकले भने, “गौतमबुद्ध अन्तरराष्ट्रिय विमानस्थलको अवलोकन गरेका छौँ। त्यहाँको अध्यागमन कार्यालयको अवस्था, आवतजावतको स्थिति, यात्रुहरुको सेवा सुविधा, व्यवस्थापन, सरसफाइ के कस्तो छ भन्ने कुरा हेरेर आएका छौँ।”
उनले विमानस्थलबाट अन्तरराष्ट्रिय उडान पुनः संचालनमा आएकोमा खुसी व्यक्त गरे। यसलाई दिगो बनाउने विषयमा सरकार गम्भीर रहेको उनको भनाइ छ।
