काठमाडौं । अमेरिकी राष्ट्रपति डोनाल्ड ट्रम्पले चिनियाँ वस्तुहरूमा १४५ प्रतिशतसम्म भन्सार शुल्क बढाएपछि, चीनले पनि प्रतिशोध स्वरूप अमेरिकी सामानहरूमा १२५ प्रतिशतसम्मको कर वृद्धि गर्ने निर्णय गरेको छ ।
चीनको भनाइअनुसार, अमेरिकी प्रशासनले लागू गरेको कर वृद्धिले अमेरिकी आयातकर्ताहरूलाई कुनै पनि आर्थिक लाभ नहुने भएकाले उनीहरूले अब यस्तो नीतिलाई गम्भीरतापूर्वक लिनुपर्ने आवश्यकता छैन । चीनले अमेरिकी कदमलाई ‘सङ्ख्याको खेल’ र ‘मजाक’को संज्ञा दिँदै त्यसलाई अस्वीकार गरेको छ।
दुई ठुला अर्थतन्त्रबिचको कर विवादले एक सातादेखि विश्व बजारमा भारी उथलपुथल ल्याएको छ । विश्वव्यापी व्यापार क्षेत्रमा अस्थिरता बढ्दै जाँदा, ट्रम्प प्रशासनमाथि बजारमा अराजकता सिर्जना गरेको आरोप चीनले लगाएको छ । जवाफमा अमेरिकाले भने चीनलाई यस्तो स्थिति उत्पन्न भएको जिम्मेवारी लिनु पर्ने बताएको छ ।
यसैबिच, ट्रम्पले केही मुलुकहरूमाथिको कर अस्थायी रूपमा स्थगन गर्ने निर्णय लिँदै ९० दिनको मोहलत दिएका छन् । तर चिनियाँ वस्तुहरूमा भने उनले अतिरिक्त करलाई निरन्तरता दिँदै कुल १४५ प्रतिशतसम्म पुर्याएका छन् ।
बेइजिङको तर्फबाट घोषणा गरिएको पछिल्लो निर्णयअनुसार, शनिवारदेखि लागू हुने गरी अमेरिकी वस्तुहरूमा १२५ प्रतिशतको कर लागु हुनेछ । चिनियाँ अर्थ मन्त्रालयले भनेको छ कि अमेरिकाले चालेको पछिल्लो कदमलाई बेवास्ता गरिनेछ र हालको भन्सार संरचनाले गर्दा अब अमेरिकी सामानले चिनियाँ बजारमा स्थान पाउन असम्भवजस्तै हुनेछ ।
