काठमाडौं । काठमाडौँ महानगरपालिकाले खानेपानी आपूर्तिकर्ता सी. एन. इन्टरप्राइजेजसँगको सम्झौता रद्द गरेको छ । कृषि तथा पशुपन्छी विभागले प्रमुख प्रशासकीय अधिकृतको निर्णयअनुसार आपूर्तिकर्तालाई पत्र काट्दै महानगरपालिकामा पिउने पानी आपूर्ति गर्ने सम्झौता खारेज गरेको जनाएको छ ।
पत्रमा प्राविधिक परीक्षणमा आपूर्ति गरिएको पिउने पानीमा कोलिफर्म फेला परेकोले काठमाडौँ महानगरपालिका बजार व्यवस्थापन तथा अनुगमन ऐन २०७७ को दफा १९ र ३० बमोजिम सम्झौता रद्द गरिएको उल्लेख छ । साथै आपूर्तिकर्तालाई २ लाख रुपैयाँ जरिवाना तोकिएको छ ।
यो पत्र सोमबार आपूर्तिकर्तालाई पठाइएको थियो । महानगरपालिकाले २०८१ वैशाख २ गते सी। एन। इन्टरप्राइजेजसँग सम्झौता गरी पिउने पानी आपूर्ति सेवा सुरु गरेको थियो ।
