काठमाडौं । हिमालय एअरलाइन्सले उड्डयन क्षेत्रमा एक दशकको उत्कृष्टता मनाउँदै प्रधानमन्त्री केपी शर्मा ओलीको जनवादी गणतन्त्र चीनको तिआन्जिन भ्रमणका लागि विशेष कूटनीतिक उडान सञ्चालन गरेको छ । यो उडानले नेपाल र चीनबीचको सम्बन्धलाई थप मजबुत बनाउने अपेक्षा गरिएको छ ।
उक्त उडानमा प्रधानमन्त्रीसहित उनकी धर्मपत्नी श्रीमती राधिका शाक्य, शिक्षा, विज्ञान तथा प्रविधि मन्त्री माननीय रघुजी पन्त, संस्कृति, पर्यटन तथा नागरिक उड्डयन मन्त्री माननीय बद्रीप्रसाद पाण्डे, आर्थिक सल्लाहकार माननीय युवराज खतिवडा र उच्च सरकारी अधिकारीहरू सहभागी थिए ।प्रतिनिधिमण्डल भदौ १८ मा हिमालयको एयरबस ३२०–२१४ मार्फत बेइजिङबाट फर्कने कार्यक्रम छ ।
हिमालय एअरलाइन्सका अध्यक्ष झो एन्योंगले त्रिभुवन अन्तर्राष्ट्रिय विमानस्थलमा प्रधानमन्त्री र प्रतिनिधिमण्डललाई स्वागत गरेका थिए । उपाध्यक्ष विजय श्रेष्ठले बिदाइ समारोहमा सहभागिता जनाएका थिए । “प्रधानमन्त्रीको भ्रमणका लागि यो उडान सञ्चालन गर्नु हाम्रा लागि गर्वको विषय हो । नेपाल सरकारको सहयोगप्रति कृतज्ञ छौँ र राष्ट्रसेवामा हाम्रो प्रतिबद्धता कायम रहनेछ,” श्रेष्ठले भने । एयरबस ३१९–११५ (एन–एजेडब्ल्यू) विमान बिहान ०७:२३ बजे काठमाडौँबाट उडेको थियो ।
नेपालको पहिलो र एकमात्र आईओएसए प्रमाणित एअरलाइन्सको रूपमा हिमालयले सुरक्षित उडान र विश्वस्तरीय सेवामा आफ्नो प्रतिष्ठा कायम राखेको छ । सन् २०१४ मा नेपाल–चीन संयुक्त साझेदारीमा स्थापित हिमालय एअरलाइन्सले मध्यपूर्व र दक्षिण एशियाका प्रमुख गन्तव्यहरूमा उडान सञ्चालन गर्छ ।
चारवटा विमानसहितको यो एअरलाइन्सले सन् २०१७ मा साउथ एशियन ट्राभल अवार्ड्स र २०२०–२१ मा आईएसओ ९००१: २०१५ प्रमाणीकरण प्राप्त गरेको छ । हवाई सुरक्षामा उत्कृष्टता र ग्राहक सन्तुष्टिका लागि प्रतिबद्ध हिमालय दक्षिण एशियाको अग्रणी एअरलाइन्स बन्ने लक्ष्यमा छ ।
