काठमाडौँ । ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङसँग नेपालका लागि जर्मनीका राजदूत उडो युजेन भोल्जले सिंहदरबारस्थित मन्त्रालयमा शिष्टाचार भेट गरेका छन्।
भेटमा राजदूत भोल्जले मन्त्री घिसिङलाई सफल कार्यकालका लागि शुभकामना व्यक्त गर्दै दुई देशबीचको आर्थिक सहकार्य र जर्मनीको सहायतामा सञ्चालित परियोजनाहरूमा छलफल गर्नुभएको थियो। प्रमुख विषयमा सौर्य ऊर्जा, लेखनाथ–दमौली २२० केभी प्रसारण लाइन आयोजना र ऊर्जा रूपान्तरणका सम्भावित क्षेत्र समावेश थिए।
मन्त्री घिसिङले जर्मनीको सहयोगमा निर्माण भएका मध्यमर्स्याङ्दी र मस्र्याङ्दी जलविद्युत् आयोजना नेपालको ऊर्जा क्षेत्रमा जीवनरेखा भएको उल्लेख गर्दै सहायता बढाउन आग्रह गरे। उनले पोखरा–बुटवल–भरतपुर हरित त्रिकोण परियोजनामा विद्युत् खपत, विद्युतीय सवारीसाधन प्रवर्द्धन र घरायसी प्रयोगका लागि प्रसारण तथा वितरण सञ्जाल विस्तार र सुधारको काम तुरुन्त सुरु हुने जानकारी दिए।
साथै, जेनजी आन्दोलनका क्रममा क्षति पुगेका सार्वजनिक र सरकारी संरचनाको परीक्षण र पुनर्निर्माणमा अन्तर्राष्ट्रिय विज्ञहरूको सहयोग उपलब्ध गराउन पनि उहाँले अनुरोध गरे।
भेटमा राजदूत भोल्जले आगामी दुई वर्षका लागि जर्मनीले उपलब्ध गराउने सहायता क्षेत्र पहिचान र पुनरावलोकनका लागि डिसेम्बरमा टोली नेपाल आउने जानकारी दिए।
