काठमाडौं । आज ४४औँ मगर एकता दिवस मगर समुदायले देशैभरि विविध कार्यक्रम गरी दिवस मनाउँदै छन् । मगर जातिको अधिकार र अस्तित्वको रक्षाका लागि एकजुट भएर लागेको सम्झना एवं नेपाल मगर सङ्घ स्थापनाका अवसरमा मगर समुदायले प्रत्येक वर्ष फागुन १५ गते यो दिवस मनाइँदै आएका छन् ।
विशेष गरी मगर बाहुल्य क्षेत्रमा विभिन्न कार्यक्रमहरू गरी दिवस मनाउने गरिन्छ । मगर समुदायले जातीय मौलिकतालाई जीवन्त राख्न प्रयत्न गरेको दिन भएकाले सार्वजनिक बिदा दिन सरकारसँग माग समेत गरेका छन् । नेपाल मगर सङ्घले देशका ४३ वटा स्थानीय सरकारले आज सार्वजनिक बिदा दिएको जानकारी दिएको छ ।
२०३९ साल फागुन १५ गते तनहुँ जिल्लाको दमौलीमा देशैभरिका मगरहरू सहभागी भई प्रथम राष्ट्रिय सम्मेलनमार्फत नेपाल मगर सङ्घ स्थापना गरेको दिनलाई मगर समुदायले मगर एकता दिवसको रूपमा मनाउँदै आएका छन् ।
राष्ट्रिय जनगणना २०७८ अनुसार नेपालमा मगर समुदायको जनसङ्ख्या ६.९ प्रतिशत अर्थात् २० लाख १३ हजार ४९८ रहेको छ ।
