काठमाडौं । इरानले युद्ध अन्त्य गर्ने प्रयासस्वरूप आफ्नो अत्यधिक संवर्धित युरेनियम भण्डार छोड्न तयार भएको दाबी गरिएको छ ।
न्यूयोर्क टाइम्सका अनुसार इरानले अमेरिका समक्ष उक्त युरेनियम हटाउन सहमति जनाएको हो । तर,यसलाई कसरी र कहाँ पठाइने भन्ने विषयमा भने अझै टुङ्गो लागेको छैन । यसबारे थप छलफल हुने जनाइएको छ ।
इरानसँग हाल चार सय किलोभन्दा बढी यस्ता युरेनियम रहेको छ, जसलाई अझ प्रशोधन गरेर परमाणु हतियार बनाउन प्रयोग गर्न सकिने चिन्ता व्यक्त गरिएको छ ।
यता, अमेरिकी राष्ट्रपति डोनाल्ड ट्रम्पले अमेरिका र इरानबीच युद्धविरामसम्बन्धी समझदारी लगभग अन्तिम चरणमा पुगेको दाबी गरेका छन् । समझदारीको मस्यौदा धेरै हदसम्म तयार भइसकेको छ र अब केवल अन्तिम स्वीकृति बाँकी रहेको ट्रम्पले बताएका छन् । यसमा होर्मुज जलमार्ग पुनः खोल्ने विषय पनि समावेश रहेको बताइएको छ ।
यसअघि एम अन्तवार्तामा ट्रम्पले इरानसँग सम्झौता हुने सम्भावना करिब ५० प्रतिशत रहेको बताएका थिए । उनले या त राम्रो समझदारी हुनेछ, या अमेरिका इरानमाथि निकै कडा कारबाहीमा जान सक्ने विकल्प पनि खुला रहेको बताएका थिए । इरान पक्षबाट भने यी दाबी बारे कुनै प्रतिक्रिया आएको छैन । तर मिडिया रिपोर्टहरुमा अमेरिका र इरान युद्धविराम ६० दिन लम्बाउन सहमत भएको र होर्मुज पनि बिस्तारै खोल्ने विषयमा लगभग सहमति भएको दाबी गरिएको छ ।
