काठमाडौं । शिक्षा नियमावलीको दशौँ संशोधनमा गरिएको शिक्षक सरुवासम्बन्धी व्यवस्थाप्रति असन्तुष्टि जनाउँदै शिक्षकहरू आन्दोलन घोषणा गरेका छन् । ‘सरुवा पीडित शिक्षक केन्द्रीय सङ्घर्ष समिति’ले विज्ञप्ति जारी गर्दै उक्त संशोधनलाई तत्काल खारेजीको माग गरेको छ।
शिक्षक सेवा आयोगको खुला प्रतिस्पर्धाबाट छनोट भई सेवा प्रवेश गरेका करिब ४० हजार नयाँ पुस्ताका शिक्षकहरूले सरकारको पछिल्लो नीतिगत निर्णयले आफूहरूलाई निरास बनाएको संयोजन नेत्रलाल भट्टराईले बताए । शिक्षकको वास्तविक जीवन, भौगोलिक विविधता, पारिवारिक दायित्व र सामाजिक यथार्थलाई नबुझी ल्याइएको व्यवस्थाले शिक्षण पेसालाई निरुत्साहित बनाएको सङ्घर्ष समितिले जनाएको छ ।
साउन ९ गते जुम प्रविधिमार्फत आयोजना गरिएको नवप्रवेशी युवा शिक्षकहरूको बैठकले हतारमा ल्याइएको त्रुटिपूर्ण १०औँ संशोधन खारेजीको माग गर्दै आन्दोलनका कार्यक्रम घोषणा गरेको हो । सङ्घर्ष समितिले साउन १५ गते काठमाडौंको माइतीघर मण्डलामा बृहत् विरोध कार्यक्रम आयोजना गर्ने निर्णय गरेको छ । उक्त प्रदर्शनमा देशभरका शिक्षक, शिक्षाप्रेमी तथा सरोकारवालाहरूलाई उपस्थित भई सहयोग गर्न समितिले आह्वान गरेको छ ।
आन्दोलनलाई देशव्यापी रूपमा परिचालन गर्न समितिले सातै प्रदेशका संयोजकहरूसहित केन्द्रीय पदाधिकारीहरूको जिम्मेवारी समेत तोकेको छ।
