काठमाडौं । देशका केही हिमाली तथा पहाडी भूभागमा आज हल्का वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।
महाशाखाका अनुसार कोशी, बागमती र गण्डकी प्रदेशका हिमाली तथा पहाडी भूभागका साथै कर्णाली र सुदूरपश्चिम प्रदेशका हिमाली भूभागका एक-दुई स्थानमा हल्का वर्षा र हिमपात हुने सम्भावना छ। तराई क्षेत्रमा मौसम मुख्यतया सफा रहने भए पनि अन्य क्षेत्रमा आंशिक बदली रहनेछ।
त्यस्तै, भोलि (आगामी दिनमा) देशका धेरै स्थानमा मध्यम वर्षा र हिमपातको सम्भावना रहेको महाशाखाले जनाएको छ। भोलि गण्डकी, कर्णाली र सुदूरपश्चिम प्रदेशका हिमाली तथा पहाडी भूभागका केही स्थानमा मेघगर्जन, चट्याङ र असिनासहित मध्यम वर्षा तथा हिमपात हुन सक्नेछ।
यसैगरी, कोशी, बागमती र लुम्बिनी प्रदेशका हिमाली तथा पहाडी भूभागका एक-दुई स्थानमा हल्का वर्षा र हिमपातको सम्भावना रहेको महाशाखाले उल्लेख गरेको छ।
भोलि देशका धेरै ठाउँमा पानी पर्ने सम्भावना भएकाले धान तथा पराल बेलैमा थन्क्याउन मौसमविद्हरूले सुझाव दिएका छन्।
Appharu.com