वीरगञ्ज चेम्बर अफ कमर्स गठन « Drishti News – Nepalese News Portal
Logo

वीरगञ्ज चेम्बर अफ कमर्स गठन


दृष्टि संवाददाता


काठमाडौं । वीरगञ्जमा चेम्बर अफ कमर्सको तदर्थ समिति गठन गरिएको छ । मनोज उपाध्यायको संयोजकत्वमा वीरगञ्ज चेम्बर अफ कमर्स, पर्साको ९ सदस्यीय तदर्थ समिति गठन गरिएको हो । समितिका सदस्यहरूमा मुकेश अग्रवाल, विकास अग्रवाल, रविकुमार, विशाल कर्नानी, पारश अग्रवाल, शम्भु अग्रवाल, विशाल पटवारी, अमित मस्कारा रहेका छन् ।

नेपाल चेम्बर अफ कमर्सका अध्यक्ष राजेशकाजी श्रेष्ठले व्यावसायिक हकहित तथा आर्थिक समृद्धिका लागि एकजुट भएर लाग्न व्यवसायीहरूलाई आग्रह गरे । नेपाल चेम्बर अफ कमर्सले ७०औँ वार्षिकोत्सव मनाइरहेको सन्दर्भमा मुलुकको आर्थिक विकासमा निजी क्षेत्रको भूमिका उल्लेखनीय रहेको उनले बताए । “सरकारले अघि सारेको समृद्ध नेपाल सुखी नेपाली महाअभियानको हामी सारथी हौं”, अध्यक्ष श्रेष्ठले भने, “यो यात्रामा हातेमालो गर्दै अघि बढ्न चाहन्छौं ।”

नेपाल चेम्बर अफ कमर्सका अध्यक्ष श्रेष्ठले हरिवन चेम्बर अफ कमर्स, सर्लाहीको भवन शिलान्यास गरेका छन् । श्रेष्ठले चार आना जग्गामा बन्न लागेको हरिवन चेम्बरको भवन शिलान्यास गरेका हुन् । हरिवन चेम्बरका महासचिव टिआर लुइँटेलले चन्दा संकलनलगायतबाट भवन निर्माण सम्पन्न गरिने बताए । हरिवन चेम्बरले प्रथम साधारणसभाबाट नयाँ कार्यसमिति चयन गरी पदस्थापन तथा सपथ ग्रहण कार्यक्रम सम्पन्न गरेको छ । हरिवन चेम्बरले ३६ सदस्यीय कार्यसमिति चयन गरेको छ । हाल यसमा २८४ जना सदस्य छन् ।

यस्तै महोत्तरी चेम्बर अफ कमर्सको नवनिर्वाचित कार्यसमितिका पदाधिकारी तथा सदस्यलाई अध्यक्ष श्रेष्ठले प्रमाणपत्र वितरण गरेका छन् । बर्दिवासमा आयोजित कार्यक्रममा नवनिर्वाचित कार्यसमितिका पदाधिकारी तथा सदस्यहरूलाई उनले प्रमाणपत्र वितरण गरेका हुन् । यसैबीच नेपाल चेम्बर अफ कमर्सको ७०औँ वार्षिकोत्सवको अवसरमा बारामा व्यवसायीहरूबीच परिचयात्मक भेटघाट भएको छ । बारामा चेम्बरको जिल्ला कमिटी र तीनवटा स्थानीय तहमा कमिटीहरू गठन भएका छन् । मकवानपुर चेम्बर अफ कमर्सले पनि गत शुक्रबार स्थानीय व्यवसायीहरूसँग अन्तक्र्रिया कार्यक्रम सम्पन्न गरेको छ ।

प्रतिक्रिया दिनुहोस्