रसुवामा कोरोना संक्रमित भेटिए « Drishti News – Nepalese News Portal
Logo

रसुवामा कोरोना संक्रमित भेटिए


दृष्टि संवाददाता


रसुवा । कोभिड–१९ सङ्क्रमण पुनः देखिन थालेपछि रसुवामा थप सजकता अपनाइएको छ । उत्तरगया गाउँपालिका–५ पहिरेबेसीँ गाउँक्षेत्रमा बसोवास गर्ने ६०, ३३ एवम् ३२ वर्षका व्यक्तिमा कोरोना सङ्क्रमण पुष्टि भएपछि पूर्वसावधानी अपनाउन र स्वास्थ्यकर्मीले परामर्श सेवा दिन थालेका छन् ।

घर नजिकको निर्माणाधिन एक जलविद्युत् आयोजनामा काम गर्न जानुपूर्व तीन जना मजदूरले त्रिशूली अस्पताल नुवाकोटमा स्वाव परीक्षण गराउँदा पोजेटिभ आएपछि उनीहरूलाई होम आइसोलेशनमा राखिएको जनस्वास्थ्य अधिकृत मनिषा देवकोटाले जानकारी दिए ।

आयोजनाले कामदार लिनुपूर्व पिसिआर परीक्षण रिपोट माग्ने गरेको छ । उनीहरूलाई ज्वरो तथा रूघाखोकीजस्ता कुनै लक्षणको समस्या नदेखिएको र गाउँ समाजमा सर्न सक्ने सम्भावनालाई मध्येनजर राख्दै सङ्क्रमित तीनै जनालाई जनस्वास्थ्यको मापदण्डका बारेमा आवश्यक परामर्शसमेत दिई अनुगमन भइरहेको बताइएको छ ।

उनीहरू नियमित घरेलु काम गर्दै आएका व्यक्ति भएकाले सामान्य खालको सङ्क्रमण हुनसक्ने आँकलन गरी पूर्णरूपले सजकता अपनाइएको स्थानीय बासिन्दाले बताएका छन् ।

यस्तै कोरोना नियन्त्रणका लागि नियमितरूपले मुखमा मास्क लगाउने, साबुनपानीले हातधुने, सामाजिक दूरी कायम गर्ने गराउने, सार्वजनिक स्थालमा कामको प्रकृति हेरी २५ जनाभन्दा बढी भेला नहुने, भेला भएपनि स्वास्थ्यको मापदण्ड पूरा गराउनुपर्ने, मठमन्दिर तथा गुम्वामा पूजारीबाट मात्र नित्य पूजापाठ गर्न गराउन आग्रह गरी सकिएको प्रमुख जिल्ला अधिकारी एवम् जिल्ला कोभिड व्यवस्थापन समितिका संयोजक ईश्वरीप्रसाद ढकालले जानकारी दिए ।

प्रतिक्रिया दिनुहोस्