पाेखरा । गण्डकी प्रदेशसमा नयाँ सरकार गठनको लागि जनमोर्चाका प्रदेशसभा सदस्य कृष्ण थापाले कांग्रेस-माओवादी-जसपा गठबन्धनलाई साथ नदिने भएका छन् । प्रदेश प्रमुख सीता पौडेलले बहुमतको सरकार बनाउन दिएको अवधि बुधबार सकिँदैछ ।
नयाँ सरकार गठनको प्रयत्न गरिरहेको विपक्षी गठबन्धनले बहुमत सांसदको हस्ताक्षरसहित सोमबार नै दाबी गर्ने तयारी गरिएको थियो । तर, जनमोर्चाका संसदीय दलका नेता थापाले हस्ताक्षर गर्न नमानेपछि कांग्रेस-माओवादी-जसपाको तयारीले मूर्त रुप पाउन सकेन ।
बहुमतका लागि राष्ट्रिय जनमोर्चाको तीन प्रदेशसभा सदस्यको पनि हस्ताक्षर चाहिन्छ । माओवादी केन्द्रका प्रदेश सभा सदस्य दीपक कोइरालाका अनुसार अहिले २८ जनाको हस्ताक्षर तयार भइरहेको छ ।
राष्ट्रिय जनमोर्चाको केन्द्रीय समिति नयाँ सरकार गठनको पक्षमा छ भने सचेतक पियारी थापाले हस्ताक्षर गर्न ह्वीप पनि जारी गरेका छन् । तरपनि प्रदेशसभा संसदीय दलका नेता समेत रहेका थापाले हस्ताक्षर गर्न अस्वीकार गरेका छन् ।
गण्डकीमा कांग्रेसका १५, माओवादीका १२ र जसपाका २ जना सांसद छन् । ६० सदस्यीय प्रदेश सभामा जनमोर्चाका सदस्यले हस्ताक्षर नगर्दा विपक्षीलाई सरकार बनाउन सांसद संख्या पुग्दैन ।
यदि प्रदेश प्रमुखले बहुमतको सरकार गठनका लागि दिएको समय सीमाभित्र दलहरुले बहुमतसहित दाबी गर्न सकेनन् भने ठूलो दलको सरकार बन्ने अवस्था आउँछ । ठूलो दल एमाले हो । २७ सांसद रहेको एमालेका संसदीय दलका नेता पृथ्वी सुब्बा गुरुङ पुनः सोही पदमा दोहोरिन सक्छन् ।
संविधानको १६८ )२० अनुसार दुई वा दुईभन्दा बढी दलको सरकार बन्न नसके १६८ ९३० मा सरकार बनाउने विकल्प प्रवेश हुन्छ। १६८ (३) अनुसार संसदको ठूलो दलले सरकार बनाउने व्यवस्था छ।
