मुख्यमन्त्रीकाे पक्षमा विश्वासको मत दिनेलाई कारबाही हुने « Drishti News – Nepalese News Portal
Logo

मुख्यमन्त्रीकाे पक्षमा विश्वासको मत दिनेलाई कारबाही हुने


दृष्टि संवाददाता


काठमाडौं । नेकपा एमाले सुदूरपश्चिम प्रदेशका अध्यक्ष कर्णबहादुर थापाले पार्टीको निर्देशन विपरीत मुख्यमन्त्रीलाई विश्वासको मत दिने प्रदेशसभा सदस्यलाई कारबाही हुने बताएका छन् ।

मुख्यमन्त्री त्रिलोचन भट्टलाई विश्वासको मत नदिन पार्टीले दिएको निर्देशनको उल्लङ्घन गर्ने प्रदेश सांसदहरुलाई कारबाही गर्न तयारी अगाडि बढाइएको उनले बताएका हुन् ।

मंगलबार मुख्यमन्त्री भट्टलाई एमालेको माधव नेपाल पक्षका १७ जना प्रदेशसभा सदस्यले विश्वासको मतको पक्षमा मतदान गरेका थिए । ओली पक्षका सात जनाले मात्रै विपक्षमा मतदान गरेका थिए भने जसपाका दुई जनाले पनि विपक्षमा मत दिंदा प्रमुख प्रतिपक्षी दल नेपाली कांग्रेसका १२ जना प्रदेशसभा सदस्य तटस्थ बसेका थिए ।

१० जेठमा बसेको एमाले स्थायी कमिटी बैठकले माओवादी नेतृत्वको प्रदेश सरकारलाई दिएको समर्थन फिर्ता लिने निर्णय गरेको थियो । तर १२ जेठमा बसेको माधव पक्षको बहुमत रहेको प्रदेश संसदीय दलले समर्थन कायमै राख्ने निर्णय गरेको थियो ।

लगत्तै मुख्यमन्त्री भट्टले एमालेका तीन मन्त्रीलाई राजीनामा गराएर चार जना मन्त्री र तीन जना राज्यमन्त्री थपेका थिए । सरकारमा सहभागी सात जना मन्त्री र प्रमुख सचेतक दुर्गाकुमारी विकलाई एमालेले यसअघि नै कारबाहीको प्रक्रिया अगाडि बढाइसकेको छ ।

प्रतिक्रिया दिनुहोस्