काठमाडौं । रुसले युक्रेनको उत्तर–पूर्वी सुमी क्षेत्रमा यात्रुवाहक मिनीबसलाई लक्षित गरी ड्रोन आक्रमण गरेको छ । शनिवार भएको यस आक्रमणमा ९ जनाको मृत्यु भएको छ भने ७ जना घाइते भएका छन् ।
सुमी क्षेत्रीय सैन्य प्रशासनका अनुसार, बिलोपिलिया सहरबाट सुमी क्षेत्रीय राजधानीतर्फ जाँदै गरेको मिनीबसलाई रुसी ल्यान्सेट ड्रोनले आक्रमण गरेको हो । घटनास्थल रुसको सीमावर्ती क्षेत्र नजिक रहेको बताइएको छ ।
यो आक्रमण रुस र युक्रेनबीच सन् २०२२ यता पहिलो पटक भएको प्रत्यक्ष वार्ताको केही घण्टापछि भएको हो । युक्रेनले यसलाई ‘निरङ्कुश युद्ध अपराध’ भन्दै कडा निन्दा गरेको छ । युक्रेनको विदेश मन्त्रालयले जारी गरेको वक्तव्यमा भनिएको छ, “रुसी सेनाले फेरि एकपटक नागरिकमाथि आक्रमण गरेर अन्तर्राष्ट्रिय कानुन र मानवताका सम्पूर्ण मापदण्डहरू उल्लङ्घन गरेको छ ।”
रुसले भने यस घटनाबारे आधिकारिक टिप्पणी गरेको छैन । तर, रुसी सरकारी सञ्चारमाध्यमहरूले सुमी क्षेत्रको सैन्य लक्ष्यलाई निशाना बनाइएको दाबी गरेका छन् ।
यो घटनाले रुस–युक्रेन द्वन्द्वमा नागरिकको सुरक्षामाथि गम्भीर प्रश्न उठाएको छ । अन्तर्राष्ट्रिय समुदायले पनि यस्ता आक्रमणको निन्दा गर्दै युद्धविराम र शान्तिका लागि आह्वान गरिरहेको छ ।
