काठमाडौं । सर्लाहीमा एक शिक्षकको गोली हानी हत्या भएको छ । प्रहरीका अनुसार शिक्षक रामपुकार यादवको हत्या भएको हो । राति साढे ८ बजे मोटरसाइकलमा आएका हतियारधारीले यादवको घरअगाडि गोली प्रहार गरी फरार भएका थिए ।
टाउकोमा गोली लागेर गम्भीर घाइते भएका यादवलाई महोत्तरीको रामगोपालपुरस्थित जानकी एकेडेमिक हस्पिटल लैजाँदै गर्दा बाटोमै मृत्यु भएको थियो । गोली प्रहार गर्ने एक जना सन्दिग्ध प्रहरीले पक्राउ गरेको छ, तर उनको नाम सार्वजनिक गरिएको छैन ।
भाग्ने क्रममा मोटरसाइकल दुर्घटना हुँदा ती व्यक्ति पक्राउ परेका हुन् । जिल्ला प्रहरी कार्यालय सर्लाहीका प्रवक्ता डीएसपी सरोज राईका अनुसार पक्राउ परेका व्यक्ति पनि दुर्घटनामा गम्भीर घाइते भएका छन् र उनलाई लालबन्दीस्थित मोडेल अस्पतालबाट थप उपचारका लागि प्रादेशिक अस्पताल जनकपुर पठाइएको छ । घटनामा संलग्न अन्य केही व्यक्ति फरार रहेको र उनीहरूको खोजी कार्य जारी रहेको प्रहरीले जनाएको छ।
