काठमाडौं । नेकपा माओवादी केन्द्रले उपसभामुख इन्दिरा राना मगरलाई हटाउने कामको विरोध जनाएको छ ।
बुधवार प्रतिनिधिसभा बैठकमा माओवादी प्रमुख सचेतक हितराज पाण्डेले उपसभामुखका बारेमा बारम्बार चर्चा गरेर आक्रमण र आतङ्कित बनाउने काम भएको भन्दै विरोध जनाए ।
प्रमुख सचेतक पाण्डेले भने, ‘उपसभामुखका बारेमा बारम्बार चर्चा गरेर आक्रमण र आतङ्कित बनाउने कामको हाम्रो दलको तर्फबाट म विरोध गर्दछु ।’
सामाजिक काममा सक्रिय एउटा जनजाति महिलामाथि यसरी आतङ्कित पार्ने र उनको मानमर्दन गरेर सदनलाई कमजोर पार्ने काम नगर्न उनले ध्यानाकर्षण गराए ।
त्यस्तै पाण्डेले राज्य व्यवस्था समिति सभापतिको निर्वाचन अविलम्ब गरी समितिको कामलाई अगाडि बढाउन माग गरे ।
उनले निजामती कर्मचारी विधेयकमाथि भएको छेडखानी छानबिन गर्न गठित विशेष समितिको प्रतिवेदन कार्यान्वयन गर्न समेत माग गरे ।
