काठमाडौं । भृकुटीमण्डपमा आयोजित नेपाल इलेक्ट्रिक पावर एण्ड लाइटस् तथा नेपाल कन्जुमर इलेक्ट्रोनिक्स एंड होम अपलायनसेस अन्तर्राष्ट्रिय प्रदर्शनीको चौथो संस्करण आज आइतबार सम्पन्न भएको छ ।
मिडिया स्पेस सोल्युसनस्, फ्युचरेक्स ट्रेड फेर एण्ड इवेंट्स, तथा एक्जीबीसन एंड ट्रेड सर्विसेस इंडियाले संयुक्त रूपमा आयोजना गरेको प्रदर्शनीको सहयोगी संस्था नेपाल विद्युत् प्राधिकरण तथा नेपाल सौर्य विद्युत् उत्पादक संघ रहेका थिए ।
प्रदर्शनीमा विद्युत् तथा विद्युतीय क्षेत्रमा आबद्ध विभिन्न कम्पनीका प्रतिनिधिहरू, सरकारी निकायका पदाधिकारीहरू, विदेशी तथा स्वदेशी ब्रान्डका सामाग्रीहरू वितरण गर्न इच्छुक व्यक्ति तथा संस्थाहरू, व्यापारी, उद्योगी, तथा सर्वसाधारणको बाक्लो उपस्थिति रहेको थियो ।
स्वदेशी तथा विदेशी कम्पनीहरूका १०० भन्दा बढी स्टलहरू रहको प्रदर्शनीमा उच्च गुणस्तरका अत्याधुनिक एवं नवीनतम प्रविधिका ट्रान्समिसन तथा डिष्ट्रिव्यूसन सामाग्री, ऊर्जा आपूर्ति तथा कन्ट्रोल डिभाइस्, हाउस वायरिङ्गका सामाग्री, तार, केबुल एवं कण्डक्टर, अत्याधुनिक प्रकारका स्विचहरू, एलइडी लाइटिङ्ग, इलेक्ट्रोनिक्स उपकरण, घरेलु विद्युतीय उपकरणहरू, चारजिङ्ग स्टेशन, ब्याट्री, कार्यालयमा प्रयोग हुने विद्युतीय प्रविधि तथा अन्य विद्युतीय सामग्रीका कम्पनीहरूको सहभागिता रहेको थियो ।
विद्युतीय उपकरणहरुलाई प्रवर्द्धन तथा प्रोत्साहन गर्ने, विद्युत् तथा गुणस्तरीय विद्युतीय सामाग्रीहरूको व्यवसाय विकास एवं यस क्षेत्रसँग आबद्ध आन्तरिक र अन्तर्राष्ट्रिय व्यापारको सहजीकरण एवं प्रवर्द्धनका लागि प्रदर्शनी आयोजना गरिएको थियो ।
नेपालीहरूको महान् पर्व बडा दसैँको केही हप्ता अगाडी आयोजना गरिएको प्रदर्शनीमा ग्राहकहरूले सहज तथा सुलभरुपमा विभिन्न राष्ट्रिय तथा अन्तर्राष्ट्रिय ब्रान्डका सामानहरू खरिद गर्ने मौका पाएका छन् ।
नेपाल इलेक्ट्रिक, पावर, लाइटस् तथा कन्जुमर इलेक्ट्रोनीक्स एंड होम अपलायनसेस प्रदर्शनीले आधारभूत रूपमा नेपालमा विद्युत्, विद्युतीय उपकरण, घरायसी रूपमा प्रयोग हुने विद्युतीय सामग्रीहरू तथा उर्जासँग आबद्ध विभिन्न उद्योगहरूले आपसी साझेदारी गर्ने, सम्बन्ध बढाउने तथा व्यवसायका अवसरहरू निर्माण गर्ने केन्द्रको भूमिका निर्वाह गरेको छ ।
विभिन्न विद्युतीय माध्यमहरूको प्रयोगमा वृद्धि गरी मुलुकमा बढ्दो जल विद्युत्को उत्पादनको खपतमा वृद्धि गर्दै देशलाई आर्थिक रूपमा सबलीकरण गर्ने एवं ऊर्जा तथा विद्युतीय व्यवसायीहरूको समग्र विकास तथा व्यापार प्रवर्द्धनमा टेवा पु¥याउने उद्देश्यका साथ आयोजना गरिएको काठमाडौँको भृकुटीमण्डपमा आयोजन गरिएको थियो ।
