काठमाडौं । धरान उपमहानगरपालिकाका मेयर हर्क साम्पाङ सोमबार बिहान त्रिभुवन अन्तर्राष्ट्रिय विमानस्थल हुँदै काठमाडौं आइपुगेका छन् । उनलाई स्वागत गर्न समर्थकहरूको ठूलो भीड विमानस्थलमा उपस्थित थियो ।
समर्थकहरूले र्यालीसहित उनलाई विमानस्थलको गेटबाटै स्वागत गरेका थिए । यसअघि पनि साम्पाङ काठमाडौं आउँदा उनका समर्थकहरू बाक्लो उपस्थितिमा देखिने गरेका छन् ।
कहिले धरानमा खानेपानीको माग राख्दै गाग्रो बोकेर माइतीघरमा प्रदर्शन गर्न त कहिले एक्लै उभिएर साङ्केतिक विरोध गर्न उनी काठमाडौं आउने गरेका छन् ।
उनका गतिविधिहरूमा काठमाडौंमा समर्थकहरूको उल्लेख्य सहभागिता रहने गरेको छ । मेयर साम्पाङले आफ्ना समर्थकहरूसँग भेटघाट गर्न चाहेको उनको सचिवालयले जनाएको छ ।
