इरान । नोबेल शान्ति पुरस्कार विजेता तथा महिला अधिकारकर्मी नर्गेस मोहम्मदीलाई इरानको एक अदालतले छ वर्षको जेल सजाय सुनाएको छ ।
सरकारविरोधी प्रदर्शनमा भेला गर्ने र अपराध गर्ने अभियानमा सहभागी भएको आरोपमा छ वर्षको जेल सजाय सुनाइएको हो ।
मोहम्मदीलाई प्रचार गतिविधिको लागि डेढ वर्षको थप जेल सजाय पनि सुनाइएको छ र उनलाई दुई वर्षको लागि दक्षिण खोरासानको पूर्वी प्रान्तको खोस्फ शहरमा जानबाट प्रतिबन्ध लगाइएको छ ।
जेल सजाय र यो प्रतिबन्ध सँगै लागु हुनेछन् । निलीले मोहम्मदीको स्वास्थ्य समस्याका कारण उनलाई अस्थायी रूपमा ‘उपचार प्राप्त गर्न जमानतमा रिहाइ’ गर्न सकिने आशा व्यक्त गरेकी छन् ।
उनले जारी गरिएको फैसला अन्तिम नभएको र पुनरावेदन गर्न सकिने बताए । विगत २५ वर्षमा ५३ वर्षीया मोहम्मदीलाई इरानको मृत्युदण्डको प्रयोग र महिलाहरूको लागि अनिवार्य ड्रेस कोडको विरुद्ध मुखर अभियान चलाएको आरोपमा बारम्बार मुद्दा चलाइएको छ र पटक-पटक जेल चलान गरिएको छ । उनको सक्रियताको सम्मानस्वरूप सन् २०२३ मा उनलाई नोबेल शान्ति पुरस्कार प्रदान गरिएको थियो ।
मोहम्मदीले पछिल्लो दशकको अधिकांश समय जेलमा बिताएकी छन् । उनले सन् २०१५ देखि पेरिसमा बस्ने आफ्ना जुम्ल्याहा बच्चाहरूलाई भेट्न पनि पाएकी छैनन् ।
मोहम्मदी जेलभित्र पनि मौन छैनन्। ईरानको जेलमा बन्दी जीवन बिताइरहेकी मोहम्मदीले महिला अधिकार र सरकारका दमनकारी नीतिविरुद्ध जेल परिसरमै निरन्तर विरोध जारी राखेकी छन्।
उनले कैदीहरूमाथिको व्यवहार, अभिव्यक्ति स्वतन्त्रता र आधारभूत मानवअधिकारको माग गर्दै पटक-पटक भोक हड्तालसमेत गरेकी छन्। यसले उनको स्वास्थ्यमा गम्भीर असर परे पनि उनी आफ्नो आन्दोलनबाट पछि हटेकी छैनन् ।
