काठमाडौं । मध्यपूर्वमा बढ्दो तनावका बीच इरानले १० लाखभन्दा बढी स्थल सेना परिचालन गरेको दाबी गरेको छ । अमेरिकाले स्थल आक्रमण गर्न सक्ने संकेतलाई मध्यनजर गर्दै सेना परिचालन गरिएको इरानी मिडियाले जनाएको छ ।
यस्तै, इरानी मिडिया रिपोर्ट अनुसार देशमा सेनामा युवा भर्तीमा वृद्धि भएको छ । हालका दिनहरूमा, बासिज, रिभोलुसनरी गार्ड्स र सेनामा भर्ना हुन युवाहरूको सङ्ख्या बढ्दो रहेको जनाइएको छ ।
यसैबीच, संयुक्त राज्य अमेरिकाले पनि मध्य पूर्वमा लगभग दश हजार थप सेना पठाउने विचार गरिरहेको छ। वाल स्ट्रिट जर्नलको रिपोर्ट अनुसार, रक्षा विभागका अधिकारीहरूले यो बलमा पैदल सेना र बख्तरबंद सवारी साधनहरू समावेश गरिने बताएका छन् ।
यी थप सेनाहरू मध्य पूर्वमा पहिले नै रहेका पाँच हजार मरीन र २,००० प्याराट्रूपरहरूमा सामेल हुने बताइएको छ ।
