काठमाडौं । यौन अपराधमा दोषी ठहर भएका जेफ्री एप्स्टिनले लेखेको सुसाइड नोट अदालतले सार्वजनिक गरिएको छ । मानव बेचबिखनसम्बन्धी मुद्दाको सुनुवाइको पर्खाइमा हिरासतमा रहेका बेला सन् २०१९ मा भएको उनको मृत्युबारे विवाद जारी रहँदा अमेरिकाको न्यूयोर्क जिल्ला अदालतका न्यायाधीश केनेथ एम। कारासले बुधबार उक्त नोट सार्वजनिक गर्न आदेश दिएका हुन् ।
सार्वजनिक भएको नोटमा लेखिएको छ, ‘उनीहरूले महिनौंसम्म मेरो अनुसन्धान गरे, केही पनि फेला पारेनन् ।’ साथै, आरोपहरू वर्षौं पुराना भएको उल्लेख गर्दै उनले लेखेका छन्, ‘बिदाइ कहिले लिने भन्ने समय आफैंले रोज्न पाउनु एउटा अवसर हो । तिमीहरू मसँग के चाहन्छौ -म रोइरहेको देख्न ? कुनै रमाइलो छैन – यसको कुनै अर्थ छैन ।’
अमेरिकी न्याय विभागले यस वर्ष सार्वजनिक गरेका एप्स्टिनसम्बन्धी लाखौँ पृष्ठका दस्तावेजमा उक्त नोटका अप्रत्यक्ष सन्दर्भ भेटिएपछि यसको चर्चा भएको थियो । एप्स्टिनसँग म्यानहट्टनको सुधारगृहमा सँगै रहेका पूर्व कैदी निकोलस टार्टाग्लियोनले सन् २०१९ जुलाईमा उक्त नोट आफूले फेला पारेको बताएका थिए । एप्स्टिन त्यसलगत्तै आफ्नो कोठामा अचेत अवस्थामा भेटिएका थिए । त्यतिबेला उनी बाँचे पनि केही सातापछि पुनः आफ्नै कोठामा मृत भेटिएका थिए । उनको मृत्यु आत्महत्या भएको निष्कर्ष निकालिएको थियो ।
टार्टाग्लियोनसम्बन्धी आपराधिक मुद्दा हेर्दै आएका अमेरिकी जिल्ला न्यायाधीश केनेथ एम.कारासले न्यूयोर्क टाइम्सको अनुरोधपछि उक्त नोटको गोपनीयता हटाउन आदेश दिएका हुन् । न्याय विभागले एप्स्टिन अनुसन्धानसँग सम्बन्धित लाखौँ दस्ताबेज सार्वजनिक गरे पनि यो नोट भने लामो समयसम्म गोप्य राखिएको थियो ।
टार्टाग्लियोनका वकिलहरूले नोट वास्तविक भएको दाबी गरेका छन् । उक्त नोट लाइन भएको कागजको एउटै पानामा हस्तलिखित रूपमा लेखिएको छ ।
चार जनाको हत्या आरोपमा अभियोग लागेका पूर्व प्रहरी अधिकारी टार्टाग्लियोनले गत वर्ष एक पोडकास्टमा आफूले उक्त नोट वकिललाई दिएको र वकिलले आफ्नो मुद्दा हेर्ने न्यायाधीशलाई बुझाएको बताएका थिए । त्यसपछि न्यायाधीशले नोटलाई गोप्य राख्ने आदेश दिएका थिए, तर न्यूयोर्क टाइम्सको अनुरोधपछि सार्वजनिक गर्न सहमत भएका हुन् ।
एप्स्टिनले सन् २००८ मा वेश्यावृत्तिका लागि प्रलोभनमा पार्ने दुई आरोपमा दोष स्वीकार गरेका थिए, जसमा एक आरोप नाबालिगसँग सम्बन्धित थियो । उनलाई सन् २०१९ मा संघीय मानव बेचबिखन आरोपमा पक्राउ गरिएको थियो र सोही वर्ष म्यानहट्टनस्थित जेलमा हिरासतकै क्रममा मृत्यु भएको थियो ।
