काठमाडौं । यस वर्ष असार १२ गतेसम्मको सरकारी आँकडा अनुसार औसत ११.३३ प्रतिशत धान रोपाइँ भएको छ ।कृषि विभागले असार १२ गतेसम्म भएको रोपाइँको विवरण सार्वजनिक गर्दै अहिलेसम्म ११.३३ प्रतिशत रोपाइँ भएको जानकारी दिएको हो । गतवर्ष अहिलेसम्म १५.६ प्रतिशत रोपाइँ भएको थियो ।
यसवर्ष पनि पहिला जस्तै सिँचाइको अभाव तथा रासायनिक मलको अभाव कायमै रहेको छ । कृषि विभागका अनुसार नेपालमा धान रोपाइँ हुने कुल क्षेत्रफल १३ लाख ८१ हजार ४८८ हेक्टर रहेको छ । जसमा हालसम्म एक लाख ८६ हजार ५८३ हेक्टरमा धान रोपाइँ भएको छ ।
प्रदेशको हिसाबले सबै भन्दा बढी कर्णाली प्रदेशमा २२.८ प्रतिशत रोपाइँ भएको विभागले जनाएको छ । त्यस्तै लुम्बिनी प्रदेशमा २०.९ प्रतिशत रोपाइँ भएको छ भने सबै भन्दा कम मधेश प्रदेशमा ५ प्रतिशत रोपाइँ भएको छ । मधेस प्रदेशमा सुख्खा भएका कारण रोपाइँ हुन सकेको छैन । नेपालको अन्नको भण्डार मानिने मधेशमा समयमा रोपाइँ हुन नसक्दा यस वर्ष धानको उत्पादन घट्ने आशङ्का गरिएको छ । विभागका अनुसार मधेसमा ३ लाख ५३ हजार १५० हेक्टर धान रोपाइँ हुने क्षेत्र रहेकोमा केवल १९ हजार १५८ हेक्टरमा रोपाइँ गरेको छ ।
त्यस्तै बागमती प्रदेशमा १२.६ प्रतिशत, कोशी प्रदेशमा ८.३ प्रतिशत र गण्डकी प्रदेशमा १२.७ प्रतिशत रोपाइँ भएको छ । त्यस्तै सुदूरपश्चिममा ९.३ प्रतिशत रोपाइँ भएको छ ।
