काठमाडौं । दैलेखको जलजले क्षेत्रमा ११२.१ अर्ब घन मिटर प्राकृतिक ग्यासको विशाल भण्डार रहेको तथ्य प्रारम्भिक अध्ययनबाट पुष्टि भएको सरकारले जनाएको छ ।
बालेन्द्र शाह नेतृत्वको सरकारले सार्वजनिक गरेको १०० दिने उपलब्धि प्रतिवेदनमा यो भण्डारको व्यावसायिक उपयोगबाट नेपालको ऊर्जा र कृषि क्षेत्रमा क्रान्तिकारी परिवर्तन आउने सम्भावना देखिएको उल्लेख छ ।
अध्ययनअनुसार यो ग्यास भण्डारको उपयोग गरी २०० मेगावाट विद्युत् उत्पादन गर्न सकिनेछ । साथै, नेपालका किसानहरूले वर्षौँदेखि भोग्दै आएको मलको अभाव टार्न दैनिक २ हजार २०० टन युरिया मल उत्पादन गर्न सकिने सैद्धान्तिक आधार तयार भएको छ । यसका अतिरिक्त सवारी इन्धनका रूपमा प्रयोग हुने सीएनजी र पीएनजी ग्यास उत्पादनको समेत प्रबल सम्भावना देखिएको प्रतिवेदनमा उल्लेख छ ।
परियोजनालाई अगाडि बढाउन ठुलो लगानी र भौतिक पूर्वाधारको विकास प्रमुख चुनौतीका रूपमा रहेको सरकारले औँल्याएको छ ।
सरकारले यस परियोजनालाई व्यवस्थित रूपमा अगाडि बढाउन विस्तृत प्राविधिक तथा आर्थिक सम्भाव्यता अध्ययनलाई तीव्रता दिने कार्ययोजना तर्जुमा गरेको छ । साथै, आवश्यक प्राविधिक जनशक्ति विकासका लागि विश्वविद्यालयहरूसँग सहकार्य गर्ने र क्षेत्रगत राष्ट्रिय मापदण्ड निर्धारण गर्ने कार्यलाई प्राथमिकताका साथ अगाडि बढाइने प्रतिवेदनमा उल्लेख छ ।
