काठमाडौं । पोर्चुगलका मिडफिल्डर ब्रुनो फर्नान्डेसले क्रिस्टियानो रोनाल्डोलाई राष्ट्रिय टोली, पोर्चुगलको फुटबल र देशकै सबैभन्दा ठूलो आइकन भएको बताएका छन् । टोलीको सुरुआती ११ मा नपर्ने भएपछि रोनाल्डोले टोली छाडेको घटनाले पोर्चुगलमा चर्चा र विवाद बढिरहेका बेला फर्नान्डेसले उनको योगदानको सम्मान गर्न आग्रह गरेका हुन् ।
४१ वर्षीय रोनाल्डोले प्रशिक्षक जर्ज जेससले नेसन्स लिगअन्तर्गत डेनमार्कविरुद्धको खेलमा आफूलाई सुरुआती टोलीमा नराख्ने बताएपछि बुधवार टोली छाडेका थिए । रोनाल्डोबिना मैदानमा उत्रिएको पोर्चुगलले उक्त खेलमा डेनमार्कलाई ४-२ गोलले पराजित गरेको थियो ।
फर्नान्डेसले शनिवार सञ्चारकर्मीसँग कुरा गर्दै रोनाल्डोले पोर्चुगलका लागि मात्र नभई विश्व फुटबलमा पनि ठूलो योगदान दिएको बताएका हुन् । ‘जे भए पनि क्रिस्टियानो रोनाल्डो हाम्रो राष्ट्रिय टोली, फुटबल र देशकै सबैभन्दा ठूलो प्रतीक रहिरहनेछन् । उनले पोर्चुगलमा मात्र नभई विश्वभर जे गरेका छन्, त्यसका लागि उनको योगदान सधैँ सम्झनलायक छ,’ फर्नान्डेसले भने ।
म्यानचेस्टर युनाइटेडका मिडफिल्डर फर्नान्डेसले पछिल्ला केही दिनमा रोनाल्डोको निर्णयलाई लिएर पोर्चुगिज समर्थकबीच देखिएको मतभेद अन्त्य गर्न आग्रह गरे । उनले भने, ‘राष्ट्रिय टोलीमा कुनै विभाजन छैन र भविष्यमा पनि हुनेछैन । बाहिरबाट जस्तोसुकै आवाज आए पनि हामी एक छौँ । देशले यस विषयमा पक्ष-विपक्षमा विभाजित हुनुहुँदैन । सबैको विचारलाई सम्मान गर्नुपर्छ ।
पोर्चुगलका लागि सर्वाधिक गोल गर्ने तथा सर्वाधिक खेल खेल्ने खेलाडीको कीर्तिमान रोनाल्डोकै नाममा छ । उनले रियल म्याड्रिड र म्यानचेस्टर युनाइटेडजस्ता प्रतिष्ठित क्लबबाट पनि खेलेका छन् । राष्ट्रिय टोलीमा उनको भविष्यलाई लिएर विभिन्न अड्कलबाजी भइरहेका बेला फर्नान्डेसले रोनाल्डोले पाउनुपर्ने सम्मानमा कमी हुन नहुने बताएका हुन् ।
पोर्चुगलले आइतबार पोर्चुगलको पोर्टोमा नर्वेविरुद्ध पुनः खेल्दैछ । प्रशिक्षक जर्ज जेससले पनि रोनाल्डोलाई पोर्चुगलको प्रतीकका रूपमा व्याख्या गरेका छन् । उनले नर्वेविरुद्धको खेलपछि रोनाल्डोको विषयमा थप छलफल गर्ने बताएका छन् ।
