काठमाडौं । प्रधानमन्त्री बालेन्द्र शाहले नेपाल प्रिमियर लिग (एनपीएल) को छैटौँ संस्करणदेखि होम एन्ड अवे प्रणालीमा प्रतियोगिता सञ्चालन गर्ने गरी आठवटै टोलीका आफ्नै क्रिकेट रङ्गशाला निर्माण गर्ने घोषणा गरेका छन् ।

प्रधानमन्त्री शाहले एनपीएलको विजेता सुदूरपश्चिम रोयल्सलाई बधाई दिँदै सबै आठ क्लबका लागि फ्लडलाइटसहितका क्रिकेट रङ्गशाला निर्माण गरिने बताएका हुन् । उनका अनुसार रङ्गशाला निर्माणको जिम्मेवारी नेपाल सरकारको पूर्वाधार विकास मन्त्रालयले लिनेछ ।
प्रधानमन्त्रीले फाप्ला क्रिकेट रङ्गशालाको निर्माण प्रक्रिया अघि बढिसकेको र आगामी तीन महिनाभित्र अन्य सबै रङ्गशालाको निर्माण प्रक्रिया पनि अघि बढाइने बताएका छन् ।
घोषणाअनुसार विराटनगर किंग्सका लागि बैजनाथपुर क्रिकेट रङ्गशाला, लुम्बिनी लायन्सका लागि सिद्धार्थ क्रिकेट रङ्गशाला, कर्णाली याक्सका लागि सुर्खेत क्रिकेट रङ्गशाला, सुदूरपश्चिम रोयल्सका लागि फाप्ला क्रिकेट रङ्गशाला, काठमाडौँ गुर्खाजका लागि कीर्तिपुर क्रिकेट मैदान, पोखरा एभेन्जर्सका लागि पोखरा क्रिकेट रङ्गशाला, जनकपुर बोल्ट्सका लागि रामजानकी क्रिकेट रङ्गशाला र चितवन राइनोजका लागि गौतमबुद्ध क्रिकेट रङ्गशाला निर्माण गरिनेछ ।
सरकारले क्रिकेटको व्यावसायिक विकास र विस्तारका लागि आवश्यक पूर्वाधार निर्माणमा सहयोग गर्ने प्रधानमन्त्री शाहले बताएका छन् । आठवटै टोलीका आफ्नै रङ्गशाला बनेपछि एनपीएललाई होम एन्ड अवे प्रणालीमा सञ्चालन गर्ने उनले बताएका छन् ।


















