काठमाडौं, १८ असार । शिक्षा र स्वास्थ्यलाई पूर्णरुपमा राष्ट्रियकरण गर्न माग गरिएको छ । शिक्षा, विज्ञान तथा प्रविधिमन्त्री गिरिराजमणि पोखरेललाई नेकपा (माओवादी केन्द्र) निकट विद्यार्थी संगठन अनेरास्ववियु (क्रान्तिकारी)ले बुधबार दशबुँदे ज्ञापनपत्र बुझाउँदै यस्तो माग गरिएको हो ।
दशबुँदे मागमा शिक्षा र स्वास्थ्यलाई पूर्णरुपमा राष्ट्रियकरण गर्न पर्ने, सर्वसुलभ एवं निःशुल्क गर्नुपर्ने, शैक्षिकसत्र सुरु भएसँगै निजी शैक्षिक संस्थाले गैरकानूनीरुपमा ४० प्रतिशतसम्म गरेको शुल्कवृद्घि तत्काल खारेज गर्नुपर्ने, गत वर्ष संयुक्त विद्यार्थी संगठन र शिक्षा मन्त्रालयबीच भएको सहमतिलाई कार्यान्वयन गर्नुपर्ने लागयत उल्लेख छ ।
क्रान्तिकारीका अध्यक्ष आलोक रायमाझीले बुझाएको सो ज्ञापनपत्रमा इञ्जिनीयरिङ शिक्षाको विषयमा राज्यले प्रष्ट मापदण्ड बनाई वैज्ञानिक शुल्क निर्धारण गर्नुपर्ने, मेडिकल कलेजले मापदण्डभन्दा बढी लिएको शुल्क तत्काल फिर्ता गरी वैज्ञानिक शुल्क निर्धारण गर्नुपर्ने, विदेशी विश्वविद्यालयबाट सम्बन्धन लिएर नेपालमा अव्यवस्थित र गैरकानूनी रुपले सञ्चालनमा रहेका कलेजलाई कानूनी प्रक्रिया पूरा गराइ निश्चित शुल्क, छात्रवृत्तिलगायत मापदण्ड पारदर्शी बनाउनुपर्नेलगायत माग रहेका छन् । ज्ञापनपत्र बुझ्दै मन्त्री पोखरेलले विद्यार्थीका जायज माग पूरा गर्ने बताए ।
