काठमाडौं । नेपाल उद्योग वाणिज्य महासंघका वरिष्ठ उपाध्यक्ष चन्द्र ढकालले सरकारले वैदेशिक रोजगारीमा गएकालाई सामाजिक सुरक्षा कोषमा जोडेपछि श्रमिक तथा तिनका परिवारहरुलाई ठूलो राहत पुग्ने बताएका छन् ।
वैदेशिक रोजगारमा रहेका श्रमिक र विदेशमा स्वरोजगारमा रहेका व्यक्तिकाई सामाजिक सुरक्षा कोषमा ल्याउने योजनाको सुरुवात कार्यक्रममा बोल्दै ढकालले रोजगारका लागि विदेश गएकाहरुले देशलाई चलायमान बनाउन ठुलो योगदान गरेको बताए ।
वैदेशिक रोजगारदाताहरू कोषमा आबद्ध हुन पाउँदा उनीहरुलाई ठुलो सहयोग पुग्ने उनको भनाई छ । ‘वैदेशिक रोजगारमा रहेकाहरुले नेपालमा वार्षिक लगभग १ खर्ब रेमिटेन्स पठाउने गरेको छन् । रगत पसिना बगाएर कमाएर पठाएको रेमिटेन्सले देश चलायमान भएकाले उनीहरुका लागि सरकारले यस्ता योजनाहरु आगामी दिनमा पनि ल्याउनुपर्छ,’ उनले भने ।
यस्तै, उनले वैदेशिक रोजगारमा रहेका रोजगारदाताहरुलाई ती देशहरूले सामाजिक सुरक्षा कोषको सुविधा नदिएको अवस्थामा सरकारले यो ठुलो कामको सुरुवात गरेको बताए ।
‘रेमिटेन्स आउँदा मात्र खुशी हुने सरकारले धेरैपछि वैदेशिक रोजगारदाताहरुको लागि अवश्यक रहेको सामाजिक सुरक्षाको दायित्व पुरा गरेको छ,’ उनले भने, ‘सरकारले श्रमिकहरुको सुरक्षाको लागि काम गर्ने सुरुवात गरेको छ।’
