सिरहा । सिरहा बजारस्थित प्रादेशिक अस्पतालको जेनेरेटरमा आगलागी भएको छ । बुधबार दिउँसो आगलागी भएपछि भागाभाग हुँदा अस्पतालमा डायलाइसिस गराइरहेका सिरहा बरियारपट्टीका ६५ वर्षीय प्रदीपकुमार दासको मृत्यु भएको छ ।
डायलाइसिस वार्डको छेउमै राखिएको जेनेरेटरमा आगलागी भएकाे थियो ।
अस्पतालका अनुसार डायलाइसिसका क्रममा रगतको कमी भएका दासलाई आगलागी हुनुअघिदेखि रगत चढाउनेक्रम भइरहेको थियो । आगलागी हुन थालेपछि स्वास्थ्यकर्मीले रगतको पाइप चुँडाइदिँदा अत्यधिक रक्तस्राव भएभएपछि गम्भीर बनेका दासको उपचारको क्रममा मृत्यु भएको अस्पताल प्रशासनले जनाएको छ ।
सो अस्पतालले आइतबार र बुधबार डायलासिस गर्दै आएको छ । आगलागीको समयमा आठजना बिरामीले डायलाइसिस गराइरहेका थिए । अस्पतालका सूचना अधिकारी अशोक सिंहका अनुसार जेनेरेटर चल्ने क्रममा बुधबार दिउँसो पौने दुई बजेतिर आगलागी भएको थियो । आगलागीको क्रममा भागदौड हुँदा अत्यधिक रक्तस्रावका कारण गम्भीर भएका दासको आकस्मिक कक्षमा उपचारका क्रममा मृत्यु भएको सिंहले जानकारी दिए ।
सिरहा नगरपालिकाको बारुण यन्त्र, स्थानीय र नेपाल प्रहरीले आधा घण्टापछि नियन्त्रणमा लिएको जिल्ला प्रहरी कार्यालय सिरहाका प्रवक्ता डिएसपी रवीन्द्रराज पाण्डेले जानकारी दिए । आगलागीबाट १३२ केबीको जेनेरटर पूर्णरुपमा जलेर नष्ट भएको छ ।
