काठमाडौं । सुनसरीको दुहवी नगरपालिकाले करिब ३३ करोड लागतमा बहुउद्देश्यीय भवन बनाउने भएको छ । भवन निर्माणका लागि ऋण लिन नगर विकास कोषसँग नगरपालिकाले सम्झौता गरेको छ । ३२ करोड ८४ लाख २९ हजार रुपैयाँ लागतमा वडा नम्बर–६ मा सो भवन बन्ने नगरपालिकाले जनाएको छ ।
सम्झौतापत्रमा नगर विकास कोषका कार्यकारी कृष्णप्रसाद सापकोटा र दुहवी नगरपालिकाका प्रमुख बेदनारायण गच्छदारले हस्ताक्षर गरे । सम्झौताअनुसार कुल लागतको ५० प्रतिशत (१६ करोड ४२ लाख १४ हजार रुपैयाँ) ऋण र १० प्रतिशत (३ करोड २८ लाख रुपैयाँ) अनुदान रकम हुनेछ । कुल लागतको ४० प्रतिशत (१३ करोड १३ लाख रुपैयाँ) भने नगरपालिकाले लगानी गर्ने पर्ने सम्झौतामा उल्लेख छ ।
नगर प्रमुख गच्छदारका अनुसार व्यवस्थित र आधुनिक सहरी सेवा सुविधा उपलब्ध गराउने उद्देश्यले भवन निर्माण हुन लागेको हो । आयोजनालाई नगरपालिकाको गौरवको आयोजनाको रूपमा हेरिएको उनले बताए ।
