काठमाडौं । अर्थमन्त्री डा. स्वर्णिम वाग्ले तीन दिने भारत भ्रमणमा जाने भएका छन् । भारत सरकारको निमन्त्रणामा उनी भारत जान लागेका हुन्।
बुधबार बसेको मन्त्रिपरिषद बैठकले उनको भारत भ्रमण स्वीकृत गरेको हो । उनी बिहीबार ६ सदस्यीय प्रतिनिधि मण्डलको नेतृत्व गर्दै नयाँ दिल्ली प्रस्थान गर्नेछन्। भ्रमण टोलीमा अर्थ मन्त्रालय र परराष्ट्र मन्त्रालयका अधिकारी सहभागी हुनेछन्।
विपदपछिको पुनर्निर्माणसहित दुई देशबीचको आर्थिक, राजनीतिक र कूटनीतिक सहकार्य भ्रमणको मुख्य उद्देश्य रहेको अर्थ मन्त्रालयले जनाएको छ।
बिहीबार साँझ ५ बजे उनले भारतीय समकक्षी निर्मला सीतारमणसँग भेटवार्ता गर्नेछन् । शुक्रबार उनले भारतीय विदेशमन्त्री डा। एस। जयशंकरसँग भेटवार्ता गर्नेछन्।
सोही दिन भारतका पूर्वविदेश सचिव श्याम शरणले आयोजना गर्ने उच्चस्तरीय कूटनीतिक संवादमा उनी प्रमुख अतिथिका रूपमा सहभागी हुनेछन्।
शुक्रबार नै उनले भारत व्यापार सम्वर्द्धन संगठनका अध्यक्ष जावेद अश्राफले आयोजना गर्ने भेटघाट कार्यक्रममा सहभागी हुनेछन्।
शनिबार बिहान भारतीय उद्योग परिसंघले आयोजना गर्ने सम्मेलनमा उनी प्रमुख वक्ताका रूपमा सहभागी हुनेछन्। सम्मेलनमा भारतका प्रतिष्ठित औद्योगिक घरानाका प्रतिनिधि सहभागी हुनेछन्।
शनिबार दिउँसो उनले दिल्ली स्कुल अफ इकोनोमिक्सले आयोजना गर्ने विकास अर्थनीति सम्बन्धी प्राज्ञिक छलफलमा प्रमुख अतिथिका रूपमा सहभागिता जनाउने छन्।
उनी शनिबार साँझ नेपाल फर्कने कार्यक्रम छ।
